კანადის ენერგეტიკის სამინისტროს მაღალჩინოსანი აცხადებს, რომ პრემიერ-მინისტრ ჯასტინ ტრუდოს მთავრობამ შესაძლოა ევროპისთვის გაზის მიწოდებას სამ წელიწადში დაიწყოს.
ბუნებრივი რესურსების მინისტრმა ჯონათან ვილკინსონმა Bloomberg News-ს განუცხადა, რომ “ევროპელი მეგობრების” დასახმარებლად ყველაზე სწრაფი გზა იქნება ნიუ-ბრუნსვიკში, კანადის ატლანტის სანაპიროზე არსებული LNG-ის ობიექტის გადაქცევა საექსპორტო ტერმინალად ესპანეთის Repsol-ის მიერ.
უილკინსონმა თქვა, რომ ევროპის ენერგეტიკული უსაფრთხოების საკითხი და რუსული ნავთობისა და გაზის მოშორება კვლავაც მთავარი საკითხია G-7 კოლეგებისთვის. თუმცა კანადისთვის, ბუნებრივი გაზის მთავარი მწარმოებლისთვის, აშკარა პრობლემაა ის, რომ არ გააჩნია საექსპორტო ტერმინალი მის აღმოსავლეთ სანაპიროზე.
მთავრობა Repsol-სა და LNG ინფრასტრუქტურის მშენებლობით დაინტერესებულ სხვა კომპანიებთან მოლაპარაკებას აწარმოებს იმის შესახებ, შეიძლება თუ არა რეგულირების პროცესის დაჩქარება.
მაიკ ბლეკიერი, Repsol-ის სპიკერი ამბობს, რომ კომპანია “უწყვეტად იკვლევს ვარიანტებს ტერმინალის ღირებულების მაქსიმალურად გაზრდის მიზნით, განსაკუთრებული აქცენტით ნახშირბადის დაბალი შემცველობის ახალ შესაძლებლობებზე, რათა დაეხმაროს ბაზრის მოთხოვნილებას და მხარი დაუჭიროს ენერგეტიკულ ტრანსფორმაციას”.
სხვა კომპანიებმა შესთავაზეს LNG ტერმინალების შექმნა აღმოსავლეთ სანაპიროზე, მათ შორის ერთი ახალი შოტლანდიის პროვინციაში Pieridae Energy-ის მიერ და მეორე კვებეკში GNL Quebec-ის მიერ.
კანადის მთავრობამ ასევე განაცხადა, რომ არსებობს შეზღუდვები, თუ რამდენი ენერგიის გაგზავნა შეუძლიათ გლობალურ ბაზრებზე.
მიმდინარე წლის დასაწყისში ვილკინსონმა განაცხადა, რომ კანადას შეუძლია დაეხმაროს ევროპას მოკლევადიან პერსპექტივაში, გაზარდოს ნედლი ნავთობის მიწოდება დღეში 200,000 ბარელით და ბუნებრივი აირის ეკვივალენტი წლის ბოლომდე 100,000-ით. დამატებითი წარმოება მიედინება სამხრეთით შეერთებულ შტატებში, რაც შექმნის ევროპისთვის მიწოდების ზრდის შესაძლებლობას.
ალბერტას პრემიერ-მინისტრმა ჯეისონ კენიმ, რომელმაც გასულ კვირას განაცხადა გადადგომის შესახებ, ახლახან განუცხადა აშშ-ის სენატის კომიტეტს, რომ კანადას შეუძლია რეალურად გაზარდოს ნავთობის ექსპორტი დღეში 900,000 ბარელით, მილსადენების ქსელის ოპტიმიზაციისა და რკინიგზის ტრანსპორტირების გზით.