არყისა და სხვა სპირტიანი სასმელების მწარმოებელი ქართული კომპანია „ბენჟი'ს“ ისრაელის ბაზარზე შესვლას გეგმავს. როგორც  კომპანიის ერთ-ერთმა დამფუძნებელმა ქრისტინა მორჩილაძემ განუცხადა, მომავალი წლიდან „ბენჟი'ს“  ისრაელის ბაზარზე ვაშლის, მსხლის, ატმის, ქლიავის და ფეიხოასგან დამზადებული ბრენდებით იქნება წარმოდგენილი. 

„ბაზარზე 2019 წელს შევედით. ამ ეტაპზე ჩვენი გაყიდვების 30% ექსპორტზე, ხოლო 70% ადგილობრივ ბაზარზე მოდის. წელს უკვე შევედით ბრიტანეთის, გერმანიის და კანადის ბაზარზე. დაწყებული გვაქვს მოლაპარაკებები ისრაელთან. საცალო ვაჭრობის გარდა გერმანიაში ჩვენი პროდუქცია ჰორეკა სექტორშიც იქნება წარმოდგენილი“,- აცხადებს მორჩილაძე. 

მისივე თქმით, „ბენჟი'ს“-ს პროდუქცია იტალიურ 50, 200, 500 და 700 მილილიტრიან ბოთლებშია ჩამოსხმული და საექსპორტო ბაზარზე ძირითადად პრემიუმ კლასის საფასო სეგმენტში იყიდება. განსაკუთრებული პოპულარობით ფეიხოასა და ალუბლისაგან დამზადებული ბრენდები სარგებლობს და გაყიდვების, თითქმის ნახევარი სწორედ ამ სახეობებზე მოდის. 

ღვინის ეროვნული სააგენტოს მონაცემებით, მიმდინარე წლის იანვარ-ნოემბერში ექსპორტირებულია 38,2 მლნ ბოთლი (0,5 ლ) ბრენდი, რაც 30%-ით აღემატება 2020 წლის ანალოგიურ მაჩვენებელს. ბრენდის ექსპორტით მიღებულმა შემოსავალმა $70,9 მლნ-ს მიაღწია (ზრდა 17%).

წყარო: „ბიზნეს ფორმულა“