რუსეთ-უკრაინის ომმა მსოფლიოს თითქმის ყველა ქვეყნის ეკონომიკაზე მოახდინა მნიშვნელოვანი გავლენა. რა გავლენა ექნება საქართველოს საფინანსო სექტორზე და რა შედეგებს მოიტანს გრძელვადიან პერიოდში ორი პარტნიორი ქვეყნის კონფლიქტი, ამ თემაზე „კომერსანტთან“ საერთაშორისო მენეჯერმა, ფინანსისტმა და ვიდეო-ბლოგერმა ნიკოლოზ შურღაიამ ისაუბრა.

„გარკვეულ ზეგავლენას ვერ გავექცევით. ერთის მხრივ, არაერთ ნეგატიურ ეფექტს მივიღებთ:

- ორივე დიდი სავაჭრო პარტნიორია და გართულდება ექსპორტ-იმპორტი.

- ტურიზმის და ფულადი ტრანსფერების ნაკადები შემცირდება. ფულადი გზავნილები რუსეთიდან უკვე აიკრძალა.

- სანქციები დაწესდა რუსულ ბანკებზე, რომელიც აისახა საქართველოში არსებულ ერთ ბანკზე. გარდა ამისა, რუსულ ბანკებთან ანგარიშსწორება გართულდება.

- კაპიტალის ანგარიში - ანუ ჩვენთან არის საკმაოდ ბევრი რუსული ინვესტიცია და ამ კომპანიებს შეეზღუდება მუშაობა. შესაძლოა მოხდეს ფულადი ნაკადების გატანა“, - აღნიშნა შურღაიამ.

მისი თქმით, მეორეს მხრივ, საქართველოში მდგრადი საფინანსო სექტორი და ეფექტური ცენტრალური ეროვნული ბანკი გვაქვს, ამიტომ, უკიდურეს სცენარებს, როგორიც არის მსოფლიო ომი, თუ გამოვრიცხავთ, რყევებს ზომიერად მსუბუქად გადავიტანთ. მაგალითად, მხოლოდ ერთი ბანკია რუსული კაპიტალით და ისიც ფინანსურად მკვიდრი ბანკი და სოლიდური მენეჯმენტის მქონეა. მათ შეუძლიათ კარგად მართონ სიტუაცია და თვითონ გაუმკლავდნენ არსებულ ვითარებას.

„მეორეს მხრივ, არის გარკვეული „პოზიტიურ ეფექტის“ პოტენციალი, რომელიც შეიძლება გაძლიერდეს თუ გონივრულად, ეფექტიანურად და სწრაფად ვიმოქმედებთ:

- ლტოლვილები და ბიზნესის გადმოტანა საქართველოში. ამთავითვე და ხაზგასმით ვიტყვი, რომ სხვის ჭირზე ხელის მოთბობა არ არის ჩვენი ტრადიცია. საქართველო სტუმართმოყვრული და მოყვასის მოყვარული ქვეყანაა. პირველ რიგში, ადამიანების დახმარებაზე უნდა ვიფიქროთ. ამავე დროს, ამ აუცილებელია ფიქრი და სწრაფი მოქმედება ბიზნესის და სოციალურ-ეკონომიკური განვითარების თვალსაზრისითად. როდესაც არსებობს მოთხოვნა, მზად უნდა ვიყოთ მას ვუპასუხოთ. უფრო კონკრეტულად, შესაძლებელია მოხდეს მოსახლეობის მიგრაცია უკრაინიდანაც და რუსეთიდანაც. მათ შორის მნიშვნელოვანი წილი იქნება ჩვენთან კულტურულად ახლობელი და მაღალი კვალიფიკაციის მქონე ადამიანი. უკვე მომმართა დახმარებისთვის რამდენიმე უცხოელმა ახლობელმა და შორიდან ნაცნობმა: ევროპელებმა, უკრაინელებმა და რუსებმა, ვინც უკრაინიდან და რუსეთიდან საქართველოში გადმოსვლას და ბიზნესის გადმოტანას განიხილავს აქტიურად. ბევრი ადამიანისთვის გაუსაძლისია ან მიუღებელია ახლა მიმდინარე პროცესები. ბევრი - ხვდება, რომ სულ მალე „რკინის ფარდის“ მიღმა შეიძლება აღმოჩნდეს. ჩვენი ქვეყანა ბევრი თვალსაზრისით მიმზიდველია მათთვის. საჭიროა ეფექტურად ვიმოქმედოთ, რომ მათაც გავუმართოთ ხელი და ჩვენი სამშობლოც გავაძლიეროთ.

- სავარაუდოა, რომ კაპიტალის გარკვეული ნაკადების დანიშნულების წერტილი საქართველო გახდეს. ბოლო წლებში საქართველოს საინვესტიციო მიმზიდველობა შემცირებულია. თუმცა, ჩვენ პოსტსაბჭოთა სივრცეში, მაინც შედარებით ბიზნეს-მეგობრულ და ამავე დროს მათთვის კულტურულად ნაცნობ, ახლობლურ გარემოდ აღვიქმებით. ამიტომ, რუსეთში და უკრაინაში მოქმედი და იძულებით ან ნებსით გასვლის სურვილის მქონე ბიზნესის და პროფესიონალთა ნაწილისთვის სავარაუდოდ მიმზიდველი აღმოვჩნდებით. რა ნაწილია ეს მომავალი გვიჩვენებს. ჩვენს კარგ მასპინძლობაზე და ჩამომსვლელთათვის კარგი პირობების შექმნაზე ბევრია დამოკიდებული“, - განმარტა ნიკოლოზ შურღაიამ.

ნინო თამაზაშვილი