ევროკავშირის კანდიდატი ქვეყნის სტატუსის თვითშეფასების კითხვარში რამდენიმე შეკითხვა სადაზღვევო სექტორს ეხება. საქართველოს მთავრობამ უნდა მიუთითოს სექტორის შესახებ არსებული ზოგადი მონაცემები.
მიიღე ინფორმაცია უფრო სწრაფად „კომერსანტის“ Telegram-ზე.
რამდენად აკმაყოფილებს საქართველოს სადაზღვევო ბაზრის მდგომარეობა ევროკავშირის მოთხოვნებს და ხომ არ შექმნის პრობლემას ის გარემოება, რომ სადაზღვევოების მნიშვნელოვან ნაწილს პირდაპირ თუ ირიბად საბანკო სექტორი ფლობს, ამ თემაზე „კომერსანტი“ „არდის“ გენერალურ დირექტორ მიხეილ ჯაფარიძეს ესაუბრა.
„ზოგადად, ქართული სადაზღვევო ბაზარი ერთის მხრივ ძალიან კონკურენტულია და მეორეს მხრივ ძალიან პატარაა ქართულ საბანკო ინსტიტუტებთან შედარებით. საბანკო ჯგუფებთან აფილირება მნიშვნელოვანი უპირატესობაა რამოდენიმე მოთამაშისთვის და ამას შედეგებიც ადასტურებს. ძირითადად სწორედ ამ კომპანიებზე მოდის სადაზღვევო ინდუსტრიის მოგების უდიდესი ნაწილი.
ევროპული რეულაციები ამ კუთხით არსებობს, თუმცა ალბათ რეგულაციებზე მეტად კონკურენციის გაჯანსაღება-გამოსწორებაზე აჯობებდა აქცენტის გაკეთება, განსაკუთრებით საბანკო სფეროში. კაპიტალის ბაზრების განვითარება მნიშვნელოვანი სტიმული იქნება როგორც სადაზღვევო სფეროს, ასევე მთელი ეკონომიკისთვის. კაპიტალის წყაროებს შორის დაბალი კონკურენცია საბანკო სისტემის არაპროპორციულ ზრდას იწვევს, რაც თავის მხრივ სხვა სექტორებზეც აისახება. აჯობებს გასწორდეს მიზეზი და შედეგი თავისით შეიცვლება“, — ამბობს მიხეილ ჯაფარიძე.
ევროკომისარმა ოლივიე ვარჰეიმ საქართველოს საგარეო საქმეთა მინისტრს, ილია დარჩიაშვილს ევროკავშირის კანდიდატი ქვეყნის სტატუსის თვითშეფასების კითხვარი 11 აპრილს გადასცა. საქართველოს მთავრობამ გამოაქვეყნა 369 კითხვისგან შემდგარი დოკუმენტის პირველი ნაწილი, რომელზე გასაცემ პასუხებზეც დამოკიდებულია საქართველოსთვის EU-ს კანდიდატის სტატუსის მინიჭების საკითხი. ევროკავშირის კანდიდატი ქვეყნის სტატუსის თვითშეფასების შევსებული კითხვარი ევროკომისიას მაისში გადაეცემა.