რადიო „კომერსანტის“ დილის ეთერში ეკონომისტმა ნოდარ სირბილაძემ განაცხადა, რომ კომერციული ბანკებისთვის მოგების გადასახადის 15-დან 20%-მდე გაზრდა, ერთგვარი ხისტი გადაწყვეტილებაა. მთავრობის ძირითადი პათოსია, რომ ბანკებს დიდი მოგება აქვთ და არ შეძლება, საფინანსო სისტემას ამხელა მოგება ჰქონდეს.

„მთავრობის ძირითადი პათოსია, რომ ბანკებს დიდი მოგება აქვთ და არ შეძლება საფინანსო სისტემას, კომერციულ ბანკებს ასეთი დიდი მოგება ჰქონდეს. ჩნდება კითხვა - რატომ? სხვა ბიზნესიც რომ დიდ მოგებაზე გავიდეს, ისიც მაღალი პროცენტით უნდა დავბეგროთ? ეს უცნაური სიგნალია ბიზნესისთვის“, განაცხადა ნოდარ სირბილაძემ.

ნოდარ სირბილაძის თქმით, კარგი იქნებოდა, რომ მთავრობას ეროვნული ბანკიც გაეკრიტიკებინა, რადგან კომერციული ბანკების დიდ მოგებაში მას დიდი წვლილი მიუძღვის.

„კომერციული ბანკების დიდ მოგებას რომ ვუყურებთ, ამაში დიდი წვლილი ეროვნულ ბანკს და მის მონეტარულ პოლიტიკას მიუძღვის. მთავრობას ეროვნული ბანკი რომ გაეკრიტიკებინა და ეთქვა, რომ მისი პოლიტიკა ერთის მხრივ მოქმედებს კომერციული ბანკების კოლოსალურ შემოსავლებზე და მეორეს მხრივ ინფლაციასა და მოსახლეობას აზარალებს, მივესალმებოდი. მაგრამ ეს იყო ძალიან სწორხაზოვანი პოზიცია და იმის დადასტურება, რომ ამ დარგმა ბევრი მოიგო და არ შეიძლება, რომ თავისუფალ ეკონომიკურ სისტემაში ვინმემ მეტი მოიგოს. საბაზრო სისტემაში ასეთი ტიპის ინტერვენცია გაუმართლებელია,“ - განაცხადა ნოდარ სირბილაძემ.

მოამზადა მაკა ბიბილაშვილმა