კატარის სახელმწიფოში საქართველოს საელჩოსა და კომპანია Spar-ს შორის თანამშრომლობის შედეგად,  დოჰას ერთ-ერთი უმსხვილეს სავაჭრო მოლში (Tawar Mall) განთავსებულ Spar-ის სუპერმარკეტების ქსელში ქართული თაფლისთვის განკუთვნილი სპეციალური კუთხე გაიხსნა.

სოფლის მეურნეობის სამინისტროს ინფორმაციით, ქართული თაფლის სპეციალური კუთხე კატარში არსებულ Spar-ის სუპერმარკეტების ქსელის ყველა ობიექტში იქნება წარმოდგენილი, სადაც მომხმარებელს შესაძლებლობა ექნება მაღალი ხარისხის ნატურალური ქართული თაფლი შეიძინოს.  უწყების განმარტებით, ქართული თაფლი ასევე ხელმისაწვდომია კატარში მოქმედ ისეთ მსხვილ სუპერმარკეტების ქსელებში, როგორებიცაა LULU, Family Food Center. კატარის სახელმწიფოში საქართველოს საელჩოსა და Mercy Corps, Alliances Caucasus Programme (ALCP)-ის თანამშრომლობით, კატარის სახელმწიფოში პირველად განხორციელდა საქართველოში ტრადიციული მეთოდებით წარმოებული ველური თაფლის - ჯარას ექსპორტიც.  

ცნობისთვის, 2020 წელს, კატარისა და საქართველოს შესაბამისი უწყებების მიერ დამტკიცდა „ვეტერინარული  სერტიფიკატი საქართველოდან კატარის სახელმწიფოში თაფლისა და მეფუტკრეობის სხვა პროდუქტების ექსპორტისათვის“, რამაც ქართველ მწარმოებლებს გაუმარტივა საქართველოში წარმოებული თაფლის ექსპორტი კატარის სახელმწიფოში და ხელი შეუწყო თაფლის ექსპორტის ზრდას საქართველოდან. შესაბამისად, 2020 წელს, წინა წელთან შედარებით, კატარში საქართველოდან თაფლის ექსპორტი 350%-ით გაიზარდა, ხოლო 2021 წელს ზრდამ,  2020 წელთან შედარებით, 255% შეადგინა.