2021 წლის 22 ნოემბერს, კატარის სახელმწიფოში სამუშაო ვიზიტის ფარგლებში, საქართველოს საგარეო საქმეთა მინისტრის მოადგილემ ალექსანდრე ხვთისიაშვილმა შეხვედრა გამართა კომპანია - Milaha-ს აღმასრულებელ ვიცე პრეზიდენტთან, ანდერს ლუნდ კრისტენსენთან. ინფორმაციას საქართველოს საგარეო საქმეთა სამინისტრო ავრცელებს.
„შეხვედრაზე განხილულ იქნა „შავი ზღვის ექსპრესის“ პროექტთან დაკავშირებული საკითხები, აგრეთვე Milaha-ს მიერ საქართველოში ლოჯისტიკის სფეროში საქმიანობის დაწყების პერსპექტივები.
Milaha წარმოადგენს ყველაზე მსხვილ გადამზიდავ და ლოჯისტიკურ კატარულ კომპანიას, რომელიც 2019 წლიდან შავ ზღვაზე ახორციელებს „შავი ზღვის ექსპრესის“ პროექტს. ხსენებული პროექტი ითვალისწინებს ფოთის, კონსტანცას (რუმინეთი), ოდესის (უკრაინა), ამბარლის (თურქეთი) და პირეოსის (საბერძნეთი) პორტებს შორის, ასევე ხმელთაშუაზღვის პორტების მიმართულებით, საკონტეინერო გადაზიდვებს.
კატარის სახელმწიფოში ვიზიტის ფარგლებში მინისტრის მოადგილემ ალექსანდრე ხვთისიაშვილმა და კატარის სახელმწიფოში საქართველოს ელჩმა ნიკოლოზ რევაზიშვილმა შეხვედრა გამართეს Lulu Group International-ის აღმასრულებელ დირექტორთან, მუჰამედ ალტაფთან. შეხვედრისას მხარეებმა განიხილეს საქართველოდან ქართული პროდუქციის ექსპორტის გაზრდის შესაძლებლობები არა მხოლოდ კატარში, არამედ ყურის სხვა ქვეყნებშიც.
ქართულმა დელეგაციამ მონაწილეობა მიიღო Lulu Hypermarket-ის ქსელში ქართული პროდუქციისთვის განკუთვნილი მუდმივმოქმედი სტენდის გახსნაში. 2021 წლის 9 ივნისიდან, კატარის სახელმწიფოში საქართველოს საელჩოს და Lulu Hypermarket-ის ერთობლივი თანამშრომლობის შედეგად, Lulu Hypermarket-ის 14 სავაჭრო ობიექტში კატარელ მომხმარებლებს აქვთ შესაძლებლობა სხვადასხვა ქართული კომპანიების მიერ წარმოებული 50-მდე ნაირსახეობის პროდუქტები შეიძინონ.
Family Food Center-ში ვიზიტისას, საქართველოს საგარეო საქმეთა მინისტრის მოადგილემ ალექსანდრე ხვთისიაშვილმა და Family Food Center-ის აღმასრულებელმა დირექტორმა პ. ფაისალმა საზეიმო ვითარებაში გახსნეს ქართული პროდუქციის კვირეული, რომელიც 30 ნოემბრამდე გაგრძელდება და კატარელ მომხმარებლებს შესთავაზებს სხვადასხვა სახეობის ქართულ პროდუქციას.
კატარში საქართველოს საელჩოს აქტიური მუშაობის, ასევე ქართულ და კატარულ კომპანიებთან თანამშრომლობით, საქართველოში წარმოებული პროდუქცია 2021 წელს ეტაპობრივად ხელმისაწვდომი გახდა კატარში მოქმედ სუპერმარკეტების 6 ქსელის სავაჭრო ობიექტებში (Lulu, Monoprix, Spar, Ansar Gallery, Approved Market, Family Food Center) “ – ნათქვამია ინფორმაციაში.