უახლოეს პერიოდში საქართველოში ლიდერი ავტოიმპორტიორი კომპანია ,,კავკასიის ავტოიმპორტი“ აფრიკის ბაზარზე შევა. ამის შესახებ ,,კომერსანტს“ კომპანიის დირექტორმა გიორგი სურგულაძემ აცნობა. მან ასევე ავტო ბაზარზე არსებულ ვითარებაზეც ისაუბრა და დასძინა, რომ პანდემიური პერიოდის მიუხედავად, ბაზარი დადებით დინამიკას ინარჩუნებს.

,,ავტო ბაზარზე ვითარება უმჯობესდება. ყოველ შემთხვევაში, ჩვენი კომპანიის მაჩვენებლები საკმაოდ გაზრდილია, ,,კავკასიის ავტოიმპორტის“ წილი ბაზარზე 30-40%-ის ფარგლებში მერყეობს. ეს არის პანდემიის პერიოდში 10-15%-იანი ზრდა. რაც შეეხება იმპორტს, უკვე 50%-იანი ზრდაა ბოლო წელიწადნახევრის განმავლობაში. გაზრდილია საიმპორტო მაჩვენებლები 2019 წელთან შედარებითაც. ამის ერთ-ერთი განმსაზღვრელი ფაქტორია ისიც, რომ სერვისებს ვხვეწავთ, გავდივართ საერთაშორისო ბაზრებზეც, საკმაოდ მყარად ავითვისეთ უკრაინის ბაზარი, სადაც საკმაოდ სოლიდური წილი გვიჭირავს, ასევე აზერბაიჯანის, სომხეთის, შუა აზიის ბაზრები და ახლა უკვე აფრიკაშიც ვგეგმავთ შესვლას. დეტალებზე დაწვრილებით ჯერჯერობით არ ვსაუბრობთ, თუმცა ეს არის უახლოესი პერიოდის პერსპექტივა, მაქსიმუმ წლის ბოლომდე უკვე აფრიკის ბაზარზეც ვიქნებით წარმოდგენილი“, - ამბობს ,,კომერსანტთან“ გიორგი სურგულაძე.

ამ დროისთვის ,,კავკასიის ავტოიმპორტში“ 253 ადამიანია დასაქმებული. როგორც კომპანიის დირექტორი აღნიშნავს, ეს არიან მაღალანაზღაურებადი კადრები, რომელთა შრომის ანაზღაურება გაცილებით მაღალია, ვიდრე ოფიციალური საშუალო ხელფასია საქართველოში.

,,საქსტატის“ მონაცემით, 2021 წლის II კვარტალში საშუალო თვიური ხელფასი ბიზნეს სექტორში 1 389.6 ლარს შეადგენს.

,,კავკასიის ავტოიმპორტი“ ყველაზე მსხვილი ავტო იმპორტიორი კომპანია და უპირობო ლიდერია კავკასიის რეგიონში. 17–წლიანი წარმატებული ისტორიის განმავლობაში კომპანიამ მოახდინა 200 000-ზე მეტი ავტომობილის იმპორტი და რეალიზაცია, ჩამოაყალიბა ფილიალების ფართო ქსელი (42 ფილიალი) საქართველოსა და მსოფლიოს სხვადასხვა ქვეყანაში.

მარი ჩიტაია