საქართველოში ყველაზე მსხვილი ავტოიმპორტიორი კომპანია ,,კავკასიის ავტოიმპორტი“ უკრაინის ბაზარზე ექსპორტს და რეექსპორტსაც ერთდროულად აჩერებს. როგორც კომპანიის გენერალური დირექტორი გიორგი სურგულაძე ,,კომერსანტთან“ ამბობს, იმის გამო, რომ უკრაინა ომის მდგომარეობაშია, ოფისები დაიხურა და შესაბამისად ბრუნვაც გაჩერდა.

სურგულაძე  დანაკარგზე ჯერჯერობით არ საუბრობს.

,,დანაკარგი დიდია, ომის პირობებში უკრაინაში რეექსპორტიც და ექსპორტიც განულებულია. ჩვენ აქედან გაგვყავდა მანქანები უკრაინის ბაზარზე, მაგრამ ასევე პირდაპირ შემოგვქონდა ამერიკიდანაც. ყველა ქვეყანაში გვქონდა ოფისები, მათ შორის, მარიოპოლში. ცხადია, ეს ოფისები დღეს ომის მდგომარეობაშია, ამიტომ ბრუნვაც  გაჩერებულია“, - ამბობს  სურგულაძე.

იმ შემთხვევაში, თუ რუსეთმა შავი ზღვა ჩაკეტა,  ავტომობილების რეექსპორტს ალტერნატიული გზების ძიება მოუწევს,  რასაც გიორგი სურგულაძე არ გამორიცხავს.

,,არაფერია გამორიცხული, მათ შორის ისიც, რომ რუსეთმა შავი ზღვა ჩაკეტოს. ამის ალბათობასაც ვუშვებთ. ამ სიტუაციაში მოგვიწევს გაჩერება და  კონტეინერების შენახვა, რომელიც შეიძლება უკვე გზაში იყოს. ამერიკაში რაც არის, ადგილზე შევინახავთ, ეს ეხება უკვე ნაყიდ ავტომობილებს. ერთ-ერთი ვარიანტია თურქეთიც, საიდანაც უკვე სახმელეთო გზით შევძლებთ გადაზიდვებს თუმცა იმედია, საქმე აქამდე არ მივა. ვფიქრობთ, არ უნდა იყოს გრძელვადიანი კონფლიქტი, რუსეთს ისეთი სანქციები დაუწესეს, ვერ გაუძლებს“, - ამბობს სურგულაძე.

მისივე ინფორმაციით, კომპანიის გაყიდვებში უკრაინას 15%-ზე მეტი ეკავა.

რაც შეეხება თანამშრომლებს,  უკრაიანაში მდებარე ,,კავკასიის ავტოიმპორტის“ ოფისებში 70 ადამიანი იყო დასაქმებული. ჯამში, კომპანიაში დასაქმებულთა რაოდენობა 280-ს შეადგენს.

როგორც კომპანიის გენერალური დირექტორი აღნიშნავს, ეს არიან მაღალანაზღაურებადი კადრები, რომელთა შრომის ანაზღაურება გაცილებით მაღალია, ვიდრე ოფიციალური საშუალო ხელფასია საქართველოში.

მარი ჩიტაია