თბილისის მერი ელიავას ბაზრობის მესაკუთრეების თაღლითებს უწოდებს. კახი კალაძის განმარტებით, პრეტენზიები და მოთხოვნები, რომლებიც კომპანიას აქვს, არის უსაფუძვლო და ქალაქისთვის ზიანის მომტანი.
კალაძის თქმით, სამუშაო შეხვედრები და მოლაპარაკებები გაგრძელდება იქამდე, ვიდრე ელიავაზე მომუშავე ადამიანებისთვის ნორმალური, კომფორტული სივრცე არ აშენდება.
„ჩვენ გავაკეთებთ იმას, რაც, პირველ რიგში, ქალაქის ინტერესებშია, რაც თბილისელების ინტერესებშია, ვიღაც გარკვეული მოთაღლითო ტიპის მხრიდან გაკეთებული არასწორი განცხადებები ვერ შეაჩერებს იმას, რომ ქალაქი იყოს მოწესრიგებული. მათ 2014 წელს ჰქონდათ წარმოდგენილი კატასტროფული გეგმა, რაც პირდაპირ ეწინააღმდეგება ქალაქის ინტერესებს, რაზეც მიიღეს უარი და გასაჩივრებული ჰქონდათ სასამართლოში, უზენაესმა დააბრუნა და თქვა, რომ განიხილოს საკრებულომ, საკრებულომ უარი განაცხადა და პროექტი არ განხორციელდა“, - განაცხადა კახა კალაძემ.
ელიავას ბაზრობაზე დასაქმებული პირები მოუწოდებენ თბილისის მერს, კომპანიას მოლის აშენების უფლება მისცეს, რათა მათ უფრო კომფორტულ პირობებში იმუშაონ.
ელიავას რეგიონული მოლის მეწილეებმა რამდენიმე წლის წინ დედაქალაქის მერს მიმართეს განცხადებით, რათა ელიავას ბაზრობაზე დიდი შენობის აშენების უფლება დაერთოთ, სადაც ყველა პერსონალი განთავსდებოდა, რაზეც უარი მიიღეს.
ელიავას ბაზრობის მფლობელები 2017 წელს აცხადებდნენ, რომ ხემოხსენებულ პროექტში 300 მლნ ლარზე მეტის ინვესტირებას აპირებდნენ. ისინი კატეგორიულად ეწინააღმდეგებოდნენ 15 000 მოვაჭრის ქალაქგარეთ გადაყვანის იდეას.
tvpirveli.ge