ანალიტიკოსების გათვლით, 2021 წელს პირადი სატრანსპორტო საშუალების ექსპლუატაციის ხარჯები თითქმის 29%-ით გაიზარდა. ამის მიზეზად ფინანსური ბაზრის მკვლევარი, ანალიტიკოსი ნიკა შენგელია საწვავის გაზრდილ ფასსა და ინფლაციას მიიჩნევს. ამასთან, ,,კომერსანტთან“ იგი აცხადებს, რომ ნავთობპროდუქტებზე მაღალი ფასები, მინიმუმ, 2 თვე შენარჩუნდება.
,,გლობალურ ბაზრებზე ფასების ზრდა და ნედლი ნავთობის მარაგების შემცირებაა, რასაც ბოლო პერიოდის განმავლობაში აქვს ადგილი. ამ პროცესის პარალელურად საქართველოში მაღალი ინფლაციაა, შესაბამისად, ავტომობილების შენახვის ხარჯმა დაახლოებით 29%-ით მოიმატა. გარდა ამისა, 2019 წელს ერთი ლიტრი რეგულარის საშუალო ღირებულება 2.22 – 2.57 ლარის ფარგლებში მერყეობდა, თუმცა პანდემიით გამოწვეული შეზღუდვებისა და საწვავზე მკვეთრად შემცირებული მოთხოვნის გამო, 2020 წლის ივნისში მისი ღირებულება 1.80 ლარამდე დაეცა. საქართველოში საწვავის გაძვირების პროცესი 2020 წლის ივლისიდან დაიწყო, რომელმაც 2021 წლის ბოლოს რეკორდულად მაღალ ნიშნულს მიაღწია. ამჟამად ბენზინგასამართ სადგურებში რეგულარის ღირებულება 3.15 ლარს აღწევს, რაც წინა წლის იანვრის მაჩვენებელზე თითქმის 40%-ით მეტია“, - აცხადებს ნიკა შენგელია.
მისი ვარაუდით, 2022 წელის თებერვლის ბოლომდე საწვავზე ფასების ვარდნა მოსალოდნელი არ არის.
,,მოგეხსენებათ, ნედლი ნავთობის ფასი კორელაციაში იმყოფება სამრეწველო და სამომხმარებლო ინფლაციასთან, ბოლო 10 წლის განმავლობაში კორელაციის კოეფიციენტი 0,81-ა. აღნიშნული კი იმის მაუწყებელია, რომ ნავთობზე ფასების ზრდა გადაეცემა სამრეწველო და სამომხმარებლო ინფლაციის ინდექსებს“, - ამბობს შენგელია ,,კომერსანტთან“.
ცნობისთის, აშშ-ის ენერგეტიკის სამინისტროს მიერ გავრცელებული ინფორმაციის თანახმად, გასული კვირის განმავლობაში აშშ–ში ნედლი ნავთობის მარაგები 2,14 მილიონი ბარელით შემცირდა და 417,851 მლნ ბარელი შეადგინა.
ბენზინის მარაგები გაიზარდა 10,13 მილიონი ბარელით და 232,787 მლნ ბარელით განისაზღვრა.
რაც შეეხება ფასებს, 2022 წლის 5 იანვრის ვაჭრობის შედეგებით, მსოფლიოს წამყვან ლონდონისა და ნიუ-იორკის სანავთობო ბირჟებზე ნავთობის ფასი გაიზარდა.
კერძოდ, ლონდონში Inter Continental Exchange Futures Europe-ზე (ICE Futures Europe)-Brent მარკის ნავთობის ფასმა შეადგინა 80,80 (+ 0.80) დოლარი/ბარელზე.
ნიუ-იორკში York Mercantile Exchange-ზე (NYMEX) - Light Sweet მარკის ნავთობის ფასმა შეადგინა 77,85 (+ 0.86) დოლარი/ბარელზე.
მარი ჩიტაია