სამხრეთკორეული Kia რუსეთში მანქანების წარმოებისა და გაყიდვების შეჩერებას განიხილავს და მხოლოდ ტექნიკური უზრუნველყოფის სერვისს დაიტოვებს. ამის შესახებ კომპანიის აღმასრულებელმა ვიცე-პრეზიდენტმა, უ-ჩონ ჩუმ განაცხადა, რასაც Bloomberg ავრცელებს.
ტოპ მენეჯერის პროგნოზით, რუსეთში 2023 წელს საავტომობილო ბაზარი შესაძლოა, „გარკვეული ხნით მთლიანად გაჩერდეს.“ კომპანია მხოლოდ გაყიდული ავტომობილების მომსახურებას გაუმკლავდება, რადგან ვიცე-პრეზიდენტის თქმით, მანქანების მიწოდება შეუძლებელი ხდება.
ევროპული ბიზნესის ასოციაციის (AEB) მონაცემებით, რუსეთში იანვარ-სექტემბერში, 2021 წლის ანალოგიურ პერიოდთან შედარებით, Kia-ს გაყიდვები 64%-ით შემცირდა. თუმცა სამხრეთკორეული ბრენდი ამ პერიოდში გაყიდული მანქანების რაოდენობით, რამაც 56 791 ერთეული შეადგინა, მეორე ადგილზეა. კომპანია ორჯერ მეტად ჩამორჩება „ავტოვაზს,“ რომელმაც 123 765 ავტომობილი გაყიდა. სამაგიეროდ, Kia უსწრებს Hyundai-სა და Renault-ს, რომელთაგან პირველმა 50 000, მეორემ კი 33 000 ავტომობილი გაყიდა. აღსანიშნავია, რომ Hyundai-ს გაყიდვები, წინა წელთან შედარებით, 62%-ით, Renault-ს გაყიდვები კი 67%-ით შემცირდა. 2021 წელს რუსეთში Kia-ს გაყიდვებმა მთლიანი რეალიზაციის 6% შეადგინა. თავად Kia-ს წილი 2021 წლის რუსეთის მთლიან გაყიდვებში, დაახლოებით, 12% იყო და მას მხოლოდ „ავტოვაზი“ უსწრებდა.
Kia მანქანებს სანკტ-პეტერბურგის ქარხანაში აწყობს, რომელსაც Hyundai Motor მართავს. Hyundai-ს ინფორმაციით, კომპანიაში 2600 ადამიანი არის დასაქმებული და წელიწადში 200 000 მანქანას აწარმოებს. ივნისში Hyundai-მ სანქტ-პეტერბურგში მეორე ქარხნის შექმნის პროექტი შეაჩერა. სამხრეთ კორეის გაზეთმა, Dong-a Ilbo-მ 18 ოქტომბერს წყაროებზე დაყრდნობით დაწერა, რომ Hyundai რუსეთში ოპერაციების შეჩერებას აპირებს, რაც, სხვა საკითხებთან ერთად, ქარხნის გაყიდვასაც მოიცავს.
სექტემბერში, სანკტ-პეტერბურგში თავისი ასაწყობი ფართობი Toyota-მაც დახურა. ფედერაციის მრეწველობისა და ვაჭრობის სამინისტროს ცნობით, კომპანია შეასრულებს თავის სოციალურ ვალდებულებებს, გადაიხდის კომპენსაციას და Toyota-სა და Lexus-ის მანქანებისთვის გაყიდვების შემდგომ მომსახურებას, ასევე, დილერების ქსელის მხარდაჭერას შეინარჩუნებს. მას შემდეგ, რაც Toyota-მ რუსეთში წარმოების სრული შეწყვეტის შესახებ გამოაცხადა, ამ საკითხის განხილვა Mazda-მაც დაიწყო. Nikkei-ის ცნობით, იაპონური კომპანია მანქანებს ვლადივოსტოკში, Sollers Auto-სთან ერთობლივ ქარხანაში აწარმოებდა. ამჟამად წარმოება უკრაინაში შექმნილი ვითარების გამო შეჩერებულია და Mazda-ს ერთობლივი ბიზნესიდან მთლიანად გამოსვლა სურს.
Toyota-სა და Mazda-ს შემდეგ რუსეთში წარმოება შესაძლოა, კიდევ ერთმა იაპონურმა ავტოკონცერნმა, Isuzu Motors-მა მთლიანად შეწყვიტოს. ერთი თვის წინ გაზეთი, Yomiuri წერდა, რომ კონცერნი ულიანოვსკის საწარმოო ობიექტებზე, კომპონენტების მიწოდების შეჩერების გამო, მანქანების წარმოების მთლიანად შეწყვეტას განიხილავს. კომპანიის რუსულმა განყოფილებამ, Isuzu Rus-მა ულიანოვსკის ქარხანაში მანქანების წარმოება ჯერ კიდევ გაზაფხულზე შეაჩერა.
Kia
