კრიპტობაზარზე მღელვარება არ ცხრება. ამჯერად მსოფლიოს ერთ-ერთი უმსხვილესი კრიპტობანკი, Celsius Network გაკოტრდა და ინვესტორებმა მილიარდობით დოლარის აქტივები დაკარგეს.

Celsius-ის მიერ სასამართლოში წარდგენილი დოკუმენტის თანახმად, პლატფორმას დაახლოებით 4,3 მილიარდი დოლარის აქტივები და 5,5 მილიარდი აშშ დოლარის ვალდებულებები ჰქონდა, კრედიტორთა რაოდენობა კი 100 000-ს აღემატებოდა. კომპანია ცდილობდა ახალი დაფინანსების მოპოვებას, მაგრამ მოლაპარაკებებმა ცხადყო, რომ გაკოტრების შესახებ განცხადება აუცილებელი იყო.

კრიპტოკრედიტორმა ტრანზაქციები გასულ თვეში გაყინა ბაზარზე ექსტრემალური მდგომარეობის გამო, ინვესტორებს კი საკუთარ აქტივებზე წვდომა შეუზღუდა.

იმგვარი პლატფორმები, როგორიც Celsius-ია, კორონავირუსის პანდემიის პერიოდში განსაკუთრებით პოპულარული გახდა. ისინი მეანაბრეებს უჩვეულოდ მაღალ საპროცენტო განაკვეთებს და სესხებზე მარტივად წვდომას სთავაზობდნენ, რაც ტრადიციულ ბანკებში იშვიათობაა.

თუმცა ეს ბიზნეს-მოდელი რისკის ქვეშ მას შემდეგ დადგა, რაც კრიპტობაზარზე ტურბულენტური გარემო შეიქმნა, ინვესტორებმა აქტივების გაყიდვა დაიწყეს, ტოკენებმა, TerraUSD-მა და Luna-მ კი კოლაფსი განიცადეს.

Celsius-მდე კიდევ ერთი ამერიკულ კრიპოკრედიტორს, Voyager Digital Ltd-ს მოუწია გაკოტრების გამოცხადება, მანამდე კი შედარებით მცირე ზომის მსესხებელმა Vauld-მა შეაჩერა თანხის განაღდება სინგაპურში.

Celsius-ის შემთხვევის შემდეგ რეგულატორებმა ნიუ ჯერსიში, ტეხასსა და ვაშინგტონში ფირმების საქმიანობასთან დაკავშირებით გამოძიება დაიწყეს. გამორიცხული არაა, რომ კრიპტობანკს რესტრუქტურიზაციის უფლება მისცენ, რათა ვალდებულებების ნაწილის დაფარვა მაინც მოახერხოს.

Bpn.ge