კიევის მერი მოსახლეობას, რომლებმაც საომარი მოქმედებების დროს კიევი დატოვეს, ურჩევს, რომ ჯერჯერობით თავი შეიკავონ უკრაინის დედაქალაქში დაბრუნებისაგან, რადგან საფრთხე ჯერ ისევ არსებობს.
ვიტალი კლიჩკოს თქმით, მიუხედავად იმისა, რომ უკრაინის დედაქალაქში ვითარება ახლა შედარებით მშვიდია, არსებობს დანაღმული ტერიტორიების საფრთხე და ასევე, სამხედროების ცნობებით, მტერს ჯერ კიდევ არ უთქვამს საბოლოო უარი თავდაპირველ მიზანზე - კიევის შტურმზე:
"მეგობრებო! ჯერ ნაადრევია კიევში, სახლში მასიურად დაბრუნება.
ჩვენ მხოლოდ სამხედროების რეკომენდაციებს ვეყრდნობით, რომლებიც ამბობენ, რომ საფრთხე ჯერ კიდევ საკმაოდ დიდია. ეს არის, პირველ რიგში, სარაკეტო თავდასხმის საფრთხე.
მეორეც, გრძელდება დედაქალაქის მიმდებარე ტერიტორიების განაღმვა, სადაც, სამწუხაროდ, უკვე არის ოკუპანტების მიერ დანაღმული ტერიტორიების აფეთქებების შედეგად გარდაცვალების შემთხვევები.
ჩვენი მთავარი ამოცანაა გადავარჩინოთ ადამიანების სიცოცხლე და მშვიდობა. ამიტომ, დედაქალაქში დაბრუნება არ არის საჭირო. ვინც დაბრუნდება, ყველა რისკი უნდა აწონ-დაწონოს.
ჩვენ ვერ აგიკრძალავთ დაბრუნებას. ჩვენ შეგვიძლია მხოლოდ გირჩიოთ. ქვეყანა საომარი მდგომარეობის პირობებში ცხოვრობს. კიევი ახლა უფრო მშვიდია, ვიდრე ადრე, მაგრამ არ დაგვავიწყდეს, რომ აგრესორის მიზანი დედაქალაქი იყო.
სამხედროები აცხადებენ, რომ აგრესორს უარი არ უთქვამს თავის გეგმებზე და ნებისმიერ დროს შეუძლია დაიწყოს მათი განხორციელება. ამიტომ, ჩვენ უნდა ვიყოთ უკიდურესად ფრთხილად და მოვუსმინოთ სამხედროების რეკომენდაციებს" - ამბობს კლიჩკო.