სამხრეთ კორეის მთავრობამ სამწუხარო უწოდა ჩრდილოეთ კორეის ლიდერის, კიმ ჩენ ინის დის, კორეის მუშათა პარტიის ცენტრალური კომიტეტის განყოფილების უფროსის მოადგილის, კიმ იე ჯონგის განცხადებას, რომელმაც სამხრეთ კორეის პრეზიდენტი იუნ სოკ-იოლი ვაშინგტონის ერთგულ ძაღლად და მარიონეტად მოიხსენია.
„ძალიან სამწუხაროა, რომ კიმ იე-ჯონგმა დღეს ჩვენი ქვეყნის ლიდერი ვულგარული სიტყვებით, თავაზიანობის თუნდაც ყველაზე ელემენტარული ნორმის დაცვის გარეშე, გააკრიტიკა,” - ნათქვამია სამხრეთ კორეის მთავრობის განცხადებაში.
კიმ იე-ჯონგმა იუნ სეოკ-იოლის ადმინისტრაცია ჩრდილოეთ ფხენიანის წინააღმდეგ მოსალოდნელი სანქციების შესახებ გაფრთხილების გამო გააკრიტიკა. მის განცხადებას კორეის ცენტრალური საინფორმაციო სააგენტო (KCNA) ავრცელებს.
„როგორც კი შეერთებულმა შტატებმა კორეის წინააღმდეგ სანქციებზე დაიწყო საუბარი, სამხრეთ კორეამ გაიმეორა ის, რაც აშშ-მ თქვა. ეს ამაზრზენი ქცევა კიდევ უფრო ნათლად აჩვენებს, რომ სამხრეთ კორეის მთავრობა შეერთებული შტატების მარიონეტი და ერთგული ძაღლია,“ - განაცხადა კიმ ჩენ ინის დამ.
ამავე დროს, მან სამხრეთ კორეის პრეზიდენტს და მის მთავრობას „იდიოტები„ უწოდა, რომლებიც სახიფათო სიტუაციის შექმნას განაგრძობენ.
„აშშ-სა და სამხრეთ კორეის მეთაურები ჩვენს წინააღმდეგ სანქციებსა და ზეწოლას რაც უფრო ამძაფრებენ, მით უფრო ძლიერდება ჩვენი სიძულვილი და რისხვა. თუ ისინი ფიქრობენ, რომ ამ სახიფათო სიტუაციის თავიდან აცილებას ჩვენზე სანქციების დაწესებით შეძლებენ, მაშინ მათ არ იციან, სიმშვიდესა და კომფორტში როგორ იცხოვრონ “, განაცხადა ჩრდილოეთ კორეის ლიდერის დამ.
მოამზადა მაკა ბიბილაშვილმა