არსებობს ინფორმაცია, რომ კლინიკების ნაწილი „დიარჯის“ ფარგლებში მეტი დაფინანსების მოპოვებას დიაგნოზების დამძიმებით შეეცდება. ამიტომ ჯანდაცვის სამინისტროს მარეგულირებელმა ორგანომ მაქსიმალურად ეფექტიანად უნდა გააკონტროლოს სამედიცინო დაწესებულებები. ამის შესახებ ეკონომისტმა პაატა ბაირახტარმა jandacva.ge-სთან საუბრისას განაცხადა.
მისი თქმით, ამ კუთხით კლინიკების შემოწმება არცთუ მარტივი იქნება, რადგან პაციენტის მდგომარეობის შეფასება სპეციფიკური თემაა და იმის დამტკიცება, რომ ადამიანის დიაგნოზი დამძიმებულია საკმაოდ რთული, თუმცა შესაძლებელია.
საყოველთაო ჯანდაცვის პროგრამის მონაწილე კლინიკები ანაზღაურების ახალ, DRG-სისტემაზე 1-ლი ნოემბრიდან გადავიდნენ. DRG-მოდელი საყოველთაო ჯანდაცვის პროგრამის ფარგლებში დაფინანსების მოცულობას პაციენტის დიაგნოზისა და სხვა რამდენიმე ფაქტორზე დაფუძნებით განსაზღვრავს. ასეთი შეიძლება იყოს ასაკი, სქესი, გეოგრაფიული ლოკაცია და სხვა.
მთავარი პოზიტიური შედეგი, რომელსაც დაფინანსების ეს სისტემა გულისხმობს, პაციენტის მიერ დამატებითი თანხის გადახდის პრაქტიკის აღმოფხვრაა.
პაატა ბაირახტარი
