კლინიკების დაფინანსების ახალ სქემის შემუშავების საკითხს ჯანდაცვის სფეროს სპეციალისტები ეხმაურებიან. ორგანიზაცია ორგანიზაცია ,,გახსოვდეს ჰიპოკრატეს“ დამფუძნებელი, ჯანდაცვის ექსპერტი მარინა ბერაძე ,,კომერსანტთან“ აცხადებს, რომ ტარიფების გადახედვისას აუცილებლად არის გასათვალისწინებელი ექიმების ანაზღაურების და კომპეტენციის საკითხები, რა მხრივაც დიდი პრობლემაა და უმეტეს შემთხვევაში ტარიფების არაგონივრული განაწილება ხდება.

საუბარია ე.წ დიარჯის (DRG) სისტემაზე, რომლის მიზანიც სხვადასხვა სამედიცინო მომსახურებაზე სამართლიანი ფასები დადგენაა. ფასების დადგენისთვის სპეციალური ფორმულა უკვე ამუშავებულია.

სისტემა გულისხმობს პაციენტზე გაწეული მკურნალობის ფაქტიური ხარჯის ანაზღაურების ნაცვლად, საავადმყოფოების დაფინანსებას პაციენტების დიაგნოზებზე დაფუძნებული, წინასწარ დადგენილი და განფასებული სამკურნალო სტანდარტების მიხედვით, რომელიც ყოველწლიურად  შეიცვლება.

მიიღე ინფორმაცია უფრო სწრაფად „კომერსანტის“  Telegram-ზე.

მარინა ბერაძის განცხადებით, მნიშვნელოვანია  სახელმწიფოს მხრიდან ტარიფები სისტემატურ კონტროლდებოდეს, რათა ჰქონდეთ  ზუსტი ინფორმაცია, რამდენად ეფექტიანად განკარგავენ კლინიკები თანხებს და რეალურად რა პრობლემაა ტარიფებთან დაკავშირებით.

,,სატარიფო პოლიტიკის გადახედვა არ არის რაღაც უცნაური და შემთხვევითი ამბავი, აუცილებელი მექანიზმია, რასაც ყველა ნორმალური ქვეყანა აკეთებს. შეიძლება, ყოველწლიურად ვერ გადაიხედოს ტარიფები, მაგრამ სისტემატური მონიტორინგი  საჭიროა,  ჩვენს შესაძლებლობებსა და მოთხოვნების შესაბამისი უნდა იყოს. ჩემი აზრით, ცუდი არაფერია, თუ ტარიფი საფუძვლიანად იქნება შესწავლილი, 520-ე დადგენილების შემოღებას თავის დროზე საკმაოდ მყარი საფუძველი ჰქონდა, მთავარია, ნებისმიერი საკითხი, რომელიც უნდა შეისწავლონ ან დადგება მომავალში, კომპეტენტური ადამიანების გადასაწყვეტია და არა ვინმეს მოსაზრებით ან ინტერესიდან გამომდინარე“, - ამბობს მარინა ბერაძე.

მისი თქმით, საქართველოში ბევრი კერძო დაწესებულებაა, ძალიან რთულია ამის კონტროლი, ამიტომ არსებობს მოდელი, რა შემთხვევაშიც შეიძლება იყოს ესა თუ ის კლინიკა საიმედო, განსაკუთრებით  პატარა კლინიკებთან მიმართებაში, რომელთა დაფინანსება ბევრ სირთულესთან არის დაკავშირებული.

,,სამედიცინო სფერო არის ყველაზე მომგებიანი  ბიზნესი და თუ ვინმეს მოგება შეუმცირდა, არ ნიშნავს, რომ ტარიფმა ცუდად იმოქმედა. რაც ყველაზე მნიშვნელოვანი და მთავარია, ერთია, როცა ტარიფებზე ვსაუბრობთ, მაგრამ მეორეა, სად მიდის და როგორ ნაწილდება თანხა, რასაც სახელმწიფო უხდის სამედიცინო დაწესებულებებს. კლინიკები ყოველთვის მაღალი მოგებით არიან დაინტერესებული, ამ დროს ძალიან ბევრი მიმართულების ექიმი არის ძალიან მძიმე მდგომარეობაში დაბალი ანაზღაურების გამო. ამიტომ მთავარი, როცა ამ საკითხების შემუშავება მოხდება, აუცილებლად უნდა იქნას გათვალისწინებული ანაზღაურებისა და კვალიფიკაციის საკითხები. ექიმის დატვირთვა შეფასებული უნდა იყოს სწორად და ხელფასი მოემატოთ“, - ამბობს მარინა ბერაძე ,,კომერსანტთან“.

შეგახსენებთ, რომ 520-ე დადგენილება 2020 წლის 21 ნოემბერს შევიდა ძალაში, რითაც კლინიკებს ერთიან სატარიფო გეგმა დაუწესდათ.

მარი ჩიტაია