2023 წლის პირველი იანვრიდან, ექიმებისა და ექთნების მინიმალური საათობრივი ანაზღაურება დაწესდა. ექიმების მინიმალური ანაზღაურება საათში 7 ლარით (თვეში მინიმუმ 1260 ლარი), ექთნების კი საათში 4.4 ლარით (თვეში მინიმუმ 792ლარი) განისაზღვრა.

შრომის ინსპექციის სამსახურის ხელმძღვანელმა ბექა ფერაძემ რადიო „კომერსანტის“ ეთერში განაცხადა, რომ იანვრის თვეში დაახლოებით 100 სამედიცინო დაწესებულება შეამოწმეს და ვინაიდან ხელფასები ჯერ ჩარიცხული არ იყო, სახელფასო კუთხით დარღვევები ვერ დააფიქსირეს. თუმცა, რამდენიმე კლინიკაში ხელშეკრულების დადების კუთხით იყო გამოწვევები. ამასთან, ბექა ფერაძე ექიმებსა და ექთნებს მოუწოდებს, რომ დარღვევის შემთხვევაში შრომის ინსპექციის ცხელი ხაზზე ანონიმურად დარეკონ. ისინი თითოეულ შემთხვევას შეისწავლიან და მათ უფლებებს დაიცავენ.

„ჩვენ როგორც შრომის ინსპექციამ და აღმასრულებელმა უწყებამ დავიწყეთ შემოწმებები. იანვრის თვეში დაახლოებით 100 სამედიცინო დაწესებულება შევამოწმეთ. ვინაიდან ხელფასები ჯერ არ იყო ჩარიცხული, სახელფასო კუთხით გამოწვევები არ დაგვიფიქსირებია, თუმცა ხელშეკრულების დადების კუთხით იყო გამოწვევები რამდენიმე კლინიკაში. ჩვენი ჩართულობით ეს დარღვევები მყისიერად აღმოიფხვრა.

მოვუწოდებთ სამედიცინო პერსონალს, თუ მენეჯმენტი არ გადაუხდის დასაქმებულს იმ მინიმალური ზღვარს, რომელსაც ჯანდაცვის სამინისტრო აწესებს, შეუძლიათ ანონიმურად მოგვმართონ ტელეფონის ნომერზე 1575, ჩვენ ჩავერთვებით, თითოეულ შემთხვევას შევისწავლით და დასაქმებულთა უფლებები იქნება დაცული“ - განაცხადა ბექა ფერაძემ.

მან ისიც თქვა, რომ ელექტრონულ პლატფორმა მზადდება, სადაც ყოველთვიურად იქნება ასახული ექიმებისა და ექთნების სამუშაო საათებისა და ანაზღაურების შესახებ, რაც მათ მონიტორინგის საშუალებას მისცემს.

„გვინდა, რომ ყოველთვიურად პულსზე გვედოს ხელი და ვიცოდეთ რამდენად სწორად ერიცხებათ სამედიცინო დაწესებულებებს კუთვნილი ანაზღაურება. სამედიცინო დაწესებულებებს მოვუწოდებთ, ყოველთვიურად დაადეკლარირონ რამდენი საათი იმუშავა თანამშრომელმა და რამდენი ანაზღაურება გაიცა. ჩვენ შესაბამისი მექანიზმებით გავაკონტროლებთ, რამდენად ზუსტად და სწორად დაერიცხა ანაზღაურება სამედიცინო პერსონალს და ეს იქნება მოდელი, რომ ადამიანის უფლებები იყოს დაცული. მასშტაბი რომ წარმოიდგინოთ, ამ რეფორმით 8000-მდე ექიმს და 9000-მდე ექიმს გაუუმჯობესდება შრომითი პირობები“, - განაცხადა ბექა ფერაძემ.