წლიური ინფლაციის განაკვეთმა ოქტომბერში 12.8%-ს მიაღწია. მოსახლეობას, სხვა ყველაფერთან ერთად, სამედიცინო მომსახურებებიც გაუძვირდა . ჯანმრთელობის დაცვის ჯგუფში ფასები ერთ წელში 8.4%-ით არის მომატებული. ფასები გაზრდილია სამედიცინო პროდუქციის, აპარატურის და მოწყობილობის, საავადმყოფოების მომსახურების და ამბულატორიული სამედიცინო მომსახურების სეგმენტში. როგორ აისახება მომატებული ფასები ჰოსპიტალურ სექტორზე, საკითხზე „სიმონ ხეჩინაშვილის სახელობის საუნივერსიტეტო კლინიკის“ გენერალური დირექტორი მაია მახარაშვილი „კომერსანტთან“ საუბრობს:

„პირველ რიგში, სამედიცინო სექტორზე ლარის დევალვაცია აისახება. პროდუქტი ევროში და დოლარში გაძვირებულია, ამასთანავე გაზრდილია ტრანსპორტირების ხარჯები. ჩვენ კი ლარში ვოპერირებთ და თავისთავად ყველაფრის შესყიდვა კურსთაშორის ცვლილებიდან გამომდინარე ხდება“, — ამბობს მაია მახარაშვილი.

კითხვაზე, დახვდებათ თუ არა საავადმყოფოში მისულ პაციენტებს გაზრდილი ფასი, მაია მახარაშვილი გვპასუხობს, რომ ტარიფები როგორც სახელმწიფოსთან, ასევე სადაზღვევოსთან უკვე შეთანხმებულია. შესაბამისად, კლინიკებს მომსახურების გაძვირება არ შეუძლიათ:

„სტაციონარული მომსახურების ძირითად შემსყიდველი არის სახელმწიფო, გადამხდელუნარიანობიდან გამომდინარე, მოსახლეობის ნაკლები წილი აქვთ კერძო სადაზღვევოებს. შესაბამისად, როგორც სახელმწიფოსთან, ასევე სადაზღვევოსთან შეთანხმებული ტარიფია, ამიტომ მომსახურების გაძვირება არ გამოდის. კლინიკებს საკმაოდ მძიმე სიტუაციაში უწევთ ოპერირება“, - განაცხადა მაია მახარაშვილი.

„სიმონ ხეჩინაშვილის სახელობის საუნივერსიტეტო კლინიკის“ გენერალური დირექტორი ამბობს, რომ ინფლაციის და დევალვაციის ფონზე ტარიფების გადახედვის საკითხი კიდევ უფრო აქტუალური გახდა.

„ჯანდაცვის ასოციაციის საბჭოში საკმაოდ ხშირად ტარდება სამუშაო შეხვედრები. ობიექტური არგუმენტები გვინდა ჩამოვაყალიბოთ, რის შემდეგაც ვგეგმავთ შეხვედრას ჯანდაცვის სამინისტროსთან, სადაც წარვადგენთ ჩვენ პრობლემებს და მათი გადაჭრის გზებს. მოლოდინი გვაქვს, რომ შეხვედრა კვირის განმავლობაში შედგება. ტარიფების თემა საკმაოდ კომპლექსურია და სწრაფი გადაჭრა საკმაოდ დიდ სირთულეებთან იქნება დაკავშირებული. მაგრამ, იმედი გაქვს, რომ ჩვენ ძალისხმევას შედეგი მოჰყვება“, — აცხადებს მაია მახარაშვილი.