უკრაინის ანტიკორუფციული სააგენტოს სანქცირების ჯგუფის ვებსაიტზე „ქართული ოცნების" დამფუძნებლის, ბიძინა ივანიშვილისა და მასთან დაახლოებული პირების გამოქვეყნების შესახებ ჰკითხეს საპარლამენტო უმრავლესობის სხდომის დასრულების შემდეგ მმართველი პარტიის თავმჯდომარემ ირაკლი კობახიძემ.
ირაკლი კობახიძის განცხადებით, ეს არის აბსურდული თემა და მასზე კომენტარის გაკეთება არის არარელევანტური.
„ჩვენ მანამდეც გვახსოვს უკრაინის ხელისუფლების კონკრეტული წარმომადგენლების განცხადებები ამასთან დაკავშირებით. შესაბამისად, აქ ახალი არაფერია. მათი ერთ-ერთი ლიდერი, არახამია გამოდიოდა პირდაპირ ამ მოთხოვნით. სიახლე აქ არაფერია ამაში. რა თქმა უნდა, ჩვენ გვაქვს ჩვენი ეჭვები იმასთან დაკავშირებით, საიდან, რა, როგორ ხდება, მაგრამ არც ამაზე გვსურს საუბარი. ზოგადად, ამ თემაზეც არ გვინდა კომენტარის გაკეთება. ზოგადად აბსურდია ეს ყველაფერი", - თქვა კობახიძემ.
სანქცირების ჯგუფი მსოფლიო მთავრობებს მოუწოდებს, უკრაინის წინააღმდეგ ომში რუსეთის მხარდაჭერის გამო სიაში შეყვანილ პირებს სანქციები დაუწესოს, მათ შორის, არის ბიძინა ივანიშვილი.
სიაში შეყვანილთა შორის არიან:
- ბიძინა ივანიშვილის ძმა ალექსანდრე ივანიშვილი;
- ბიძინა ივანიშვილის დეიდაშვილი, ბიზნესმენი უჩა მამაცაშვილი;
- უჩა მამაცაშვილის შვილი, ბიზნესმენი ტიტე მამაცაშვილი [სიაში მითითებულია, როგორც ტატე];
- ქეთევან ხარაიძე, ბიზნესმენი და სიის თანახმად, ალექსანდრე ივანიშვილის ცოლი;
- ირაკლი რუხაძე, ტელეკომპანია „იმედის" მფლობელი კომპანიის მესაკუთრე;
- ბიზნესმენი დავით ხიდაშელი;
- სულხან პაპაშვილი, ბიზნესმენი, 1998–2003 წლებში საქართველოს სახელმწიფო დაცვის სპეციალური სამსახურის უფროსი;
- ლევან ვასაძე, ბიზნესმენი, პარტია ერი-ს დამფუძნებელი;
- საქართველოს ყოფილი მთავარი პროკურორი ოთარ ფარცხალაძე;
- ბიზნესმენი ვანო ჩხარტიშვილი;
- ბიზნესმენი გიორგი კაპანაძე.
სიის გამოქვეყნებას გამოეხმაურა ხატია დეკანოიძე, ფრაქცია „ერთიანი ნაციონალური მოძრაობა - ძალა ერთობაშია"-ს თავმჯდომარე, 2015 - 2016 წლებში უკრაინის ეროვნული პოლიციის უფროსი.
„უკრაინის კორუფციასთან ბრძოლის ეროვნული სააგენტო არის უკრაინის სახელმწიფო უწყება, რომელიც ძალიან აქტიურად თანამშრომლობს საერთაშორისო პარტნიორებთან. მათ შორის ის ინფორმაცია, რომელიც არის გადაცემული და გავრცელებული უკრაინის სააგენტოს მიერ, რეალურად უკავშირდება ბიძინა ივანიშვილს და მისი უახლოესი გარემოცვის ძალიან სერიოზულ კავშირებს და სქემებს რუსეთთან. ანუ უკრაინის კორუფციის წინააღმდეგ ბრძოლის სააგენტოს მთავარი ფუნქცია სანქციებთან მიმართებაში არის ის, რომ გამოავლინოს იმ ადამიანების ნუსხა და დაასანქციროს, მოახვედროს სანქციების ნუსხაში, რომლებიც 24 თებერვლის შემდეგ უკრაინაში რუსული სამხედრო აგრესიის ძალიან მძიმე მოვლენების და სამხედრო აგრესიის შემდეგ ხელს უწყობდნენ პუტინის რეჟიმს იმაში, რომ უკრაინაში რეალურად სამხედრო მოქმედებები ეწარმოებინათ, - განაცხადა დეკანოიძემ და განაგრძო, - მაშ ასე, დასანქცირებულია 15 ადამიანი. ჯერჯერობით უკრაინის პირველადი სანქციების და შემდეგ უკვე მე გეტყვით, როგორ გავრცელდება ეს საერთაშორისო პარტნიორების მიერ, გამოიყურება შემდეგნაირად: ბიძინა ივანიშვილი, მთავარი ოლიგარქი, რომელიც არა მხოლოდ ეჭვმიტანილი, არამედ დადასტურებულად არის სანქციების ნუსხაში იმიტომ, რომ იგი ეხმარება ასევე დასანქცირებულს საერთაშორისო მასშტაბით რუს ოლიგარქ ევტუშენკოვს, სიაში ასევე არიან: ალექსანდრე ივანიშვილი, ქეთევან ხარაიძე, გიორგი კაპანაძე, უჩა მამაცაშვილი, ტიტე მამაცაშვილი, ალექსეი პოლტაშენკო, ვანო ჩხარტიშვილი, დავით ხიდაშელი, სულხან პაპაშვილი, დიმიტრი კორძაევი, დიმიტრი ტროიცკი, ლევან ვასაძე, ოთარ ფარცხალაძე".
ევტუშენკოვსა საქართველოს ყოფილი პრემიერ-მინისტრს, ბიზნესმენ ბიძინა ივანიშვილს კარგი ნაცნობობა აკავშირებით, 2022 წელს ინტერნეტში გავრცელდა მათი სატელეფონო საუბრის აუდიო ჩანაწერი, ერთ-ერთი ჩანაწერში ევტუშენკოვი ივანიშვილს დაბადების დღეს ულოცავს და მას „ბორინკად“ მოიხსენიებს. უკრაინაში მიმდინარე ომის პარალელურად მათ შორის საუბარი ორჯერ შედგა 10 და 13 მარტს. პირველ ჩანაწერში საუბრის თემა ხორბალს ეხება. მეორეში ევტუშენკოვი ივანიშვილს სთხოვს მის წარმომადგენელთან კორპორაცია „სისტემის“ ვიცე-პრეზიდენტთან ალი უზდენოვთან შეხვედრას. საუბრის გარკვეული ეპიზოდები თავად ევტუშენკოვმა დაადასტურა.
13 აპრილს ცნობილი გახდა, რომ ევრუშენკოვს შეეხო ბრიტანეთის მიერ დაწესებული სანქციები და მან დატოვა რუსული ჰოლდინგის „სისტემის“ დირექტორთა საბჭოს თავმჯდომარის პოსტი.
ბიძინა ივანიშვილი
