კოლხური ბზა, რომელიც გადაშენების საფრთხის წინაშეა მაჭახელას ეროვნულ პარკში ისევ გამოჩნდა. ამის შესახებ ინფორმაცია პარკის ფეისბუკგვერდზე გავრცელდა.

მაჭახელას ეროვნულმა პარკმა ბზის ახალი ნაზარდის ფოტო გამოაქვეყნა. „კოლხური ბზა — სახეობა, რომელიც მაჭახელას ეროვნულ პარკში თითქმის გაქრა, მაგრამ უკვე ახალი ნაზარდები დაფიქსირდა 2019 წლის შედეგ პირველად“ —  ნათქვამია ფოტოს აღწერაში.

აღსანიშნავია, რომ კოლხურმა ბზამ საქართველოში და განსაკუთრებით აჭარაში, რამდენიმე წელია,  ხმობა დაიწყო.

სამეცნიერო, სახელმწიფო და საზოგადოებრივი ორგანიზაციები შექმნილ სიტუაციას ეკოლოგიურ კატასტროფად აფასებენ და სახეობის გადარჩენის ეროვნულ გეგმაზე თანხმდებიან, რაშიც მოსახლეობის ჩართულობასა და ცოდნაზე დამყარებულ მოქმედებას განსაკუთრებული მნიშვნელობა აქვს.

ეს კი იმ ფონზე ხდება, რომ ბზა ათასობით წლის წინ კოლხური ტყეების განუყოფელ ნაწილს წარმოადგენდა, თუმცა მოულოდნელად, 21-ე საუკუნის დასაწყისში კოლხური ბზა დიდი პრობლემების წინაშე აღმოჩნდა.

კოლხური ბზა კავკასიის ენდემია, რაც იმას ნიშნავს, რომ სახეობა ბუნებრივ გარემოში მხოლოდ ჩვენს რეგიონში იზრდება. კოლხური ბზის მნიშვნელოვანი კორომები იყო აჭარაში, იმერეთში, სამეგრელოში, გურიაში, რაჭაში.

კოლხური ბზის გაქრობის მიზეზად კი ორი მიზეზი სახელდება ესაა „ბზის სიდამწვრის“ სახელით ცნობილი სოკო და მეორე - პარაზიტი მწერი ბზის ალურა.

როგორც ექსპერტები აღნიშნავენ, კოლხური ბზის კორომების განადგურებაში დიდი როლი შეასრულა ამ მცენარის დაავადებებმა, თუმცა ბზის რელიგიური და ყოფითი მნიშვნელობის გამო, მცენარეს ადამიანის ხელით არანაკლები ზიანი მიადგა.

აღსანიშნავია, რომ ტყეში ბზის მოჭრა, ამოძირკვა ან ტოტების დაზიანება დასჯადი ქმედებაა და აღნიშნულზე გათვალისწინებულია, როგორც ადმინისტრაციული, ასევე სისხლის სამართლის პასუხისმგებლობა.