„კომერსანტის“ ექსკლუზიური ინფორმაციით, თბილისში, ლისის ტბის მიმდებარედ, გაეროს პროექტების მომსახურების ოფისის (UNOPS) დაკვეთით სასწავლო კომპლექსის მშენებლობა იგეგმება. პროექტი, რომელიც 26 099 კვ.მ. ტერიტორიაზე ხორციელდება, სკოლას და კამპუსს გააერთიანებს. როგორც „კომერსანტმა“ გაარკვია, არაკომერციული ორგანიზაცია დედაქალაქის მთავრობისგან ახლა მიწის ნაკვეთის სამშენებლოდ გამოყენების პირობების დადგენას ელოდება.

თბილისის მერიის არქიტექტურის სამსახურის ვებ-გვერდზე განთავსებული ინფორმაციის მიხედვით, ევროპული სკოლის შენობა 3 მიწისზედა და 1 მიწისქვეშა სართულისგან შედგება და მას 10 120 კვ.მ. დაეთმობა, ხოლო სტუდენტური საცხოვრებელი 2 500 კვ მ.-ზე აშენდება და 4-სართულიანი იქნება. განმარტებით ბარათში ვკითხულობთ, რომ პროექტი ტერიტორიაზე არსებული ხე-ნარგავების მაქსიმალური შენარჩუნების გზით მრავალფეროვანი ლანდშაფტური ინფრასტრუქტურის შექმნას ითვალისწინებს.

მომზადებულ დოკუმენტში წერია, რომ ტერიტორიის რელიეფური სირთულიდან გამომდინარე, ლანდშაფტურ გეგმარებითი პროექტი ძირითადად ტერასული ბაღების იდეას ეფუძნება და ზონები შესაბამისი ფუნქციონალური დატვირთვებით არის გამოყოფილი.

პირველი ზონა ცენტრალური შესასვლელია, რომლის ლანდშაფტურ არქიტექტურული პროექტი, არქიტექტორების აზრით, მაღალი ესთეტიკური ღირებულების მქონე ლანდშაფტს წარმოადგენს. გარდა ამისა, ამავე ზონაში დაიდგმება ქანდაკება, რომლის კონტექსტიც, პროექტის ავტორების თქმით, სოციალური, ეროვნული და რელიგიური თანასწორობის იდეას გაითვალისწინებს.

მეორე ზონა სპორტული მოედნების მიმდებარე გამწვანებაა. მესამე ტერიტორია სკოლის შენობასა და სპორტულ მოედნებს შორის, მეოთხე სკოლის შენობის მიმდებარე გამწვანებაა, რომლის ლანდშაფტური გეგმარება ითვალისწინებს სკოლის პერიმეტრის გამწვანებას მაღალი ესთეტიკური ღირებულების მქონე შერეული ნარგავებით.

მეხუთე ზონა კაფეტერიის მიმდებარე ტერასის გამწვანებაა, ის კაფეტერიის ინტერიერის და ექსტერიერის ერთიანობის შექმნას და მისი ფუნქციის გაძლიერებას ეფუძნება.

მეექვსე ზონა — სკოლის ცენტრალური შესასვლელია, რომელიც წარმოადგენს პროექტის ერთ-ერთ მნიშვნელოვან კვანძს. შესაბამისად, საპროექტო ჯგუფს მიაჩნია, რომ მისი ესთეტიკური ღირებულების გაზრდის მიზნით კონცეპტუალურ პროექტში წარმოდგენილია გამწვანებული ჯიბეები.

მეშვიდე ზონა — ტერასული ბაღებია. სწორედ აქ შემოდის ტერასული ბაღის კონცეფცია, გაჩნდა დამატებითი საყრდენი კედლები, რომლებიც შესაძლებელია მოეწყოს დეკორატიული გაბიონის საშუალებით.

მერვე ზონა — სათბური და მისი მიმდებარე გამწვანებაა და წარმოადგენს სათბურის კონცეფციის ექსტერიერში გადმოტანის იდეას. პროექტის მიხედვით გათვალისწინებულია საპილოტე მიწის ნაკვეთები, სადაც მოსწავლეები გამოიყვანენ როგორც ბოსტნეულის ჩითილებს, ასევე დეკორატიული მცენარეების ნერგებს.

მეცხრე ზონა — საერთო საცხოვრებლის მიმდებარე გამწვანება, რომლის ლანდშაფტური გეგმარება ითვალისწინებს სკოლის პერიმეტრის გამწვანებას მაღალი ესთეტიკური ღირებულების მქონე შერეული ნარგავებით.

მეათე ზონა — საერთო საცხოვრებელი ბლოკის სიახლოვეს მდებარეობს და მისი ფუნქციონალური დატვირთვა ითვალისწინებს სოციალური აქტივობების კომპონენტის გასაძლიერებელ, როგორც ინფრასტრუქტურულ, ასევე ბუნებრივ ელემენტებს რაც შეიძლება წარმოდგენილი იყოს ხეხილის ბაღების, სანელებლების ან/და მიკრო აგრო-ნაკვეთებით.

განმარტებითი ბარათის მიხედვით, მეთერთმეტე ზონა წარმოადგენს პასიური დასვენების ნაწილს, რომელიც ტერიტორიის განაპირას მდებარეობს, სადაც სარელაქსაციო დანიშნულების სივრცეების გაჩენაა შესაძლებელია (მაგ. მედიტაციის ზონა, იოგა და ა.შ).

დოკუმენტში ასევე ნათქვამია, რომ ტერიტორიაზე არსებული გამწვანება ძირითადად წარმოდგენილია ბუჩქოვანი მცენარეებით, რომელთა ესთეტიკური ღირებულება საკმაოდ დაბალია, გარდა ამისა, მათი 15% განეკუთვნება ტოქსიკურ მცენარეთა ჯგუფს, ამიტომ მნიშვნელოვანია ტერიტორიიდან მათი გატანა და ჩანაცვლება ნაკლებად ალერგიული და არატოქსიკური მცენარეებით. გარდა ამისა, ირკვევა, რომ კომპლექსის პერიმეტრზე განთავსდება ბუნებრივი ქარსაცავი ზოლი, რათა ტერიტორიაზე ოპტიმალური მიკროკლიმატი შექმნას.

ბაჩო ადამია