სს „საქართველოს ჯანდაცვის ჯგუფმა“ მედიაჰოლდინგ „კომერსანტთან“ სასამართლო დავა წააგო. მოსამართლემ კლინიკების ქსელის იურისტის არცერთი მოთხოვნა არ დააკმაყოფილა, რაც მოულოდნელი არ ყოფილა „კომერსანტის“ იურისტის ამირან გიგუაშვილისთვის, რომელიც აცხადებს, რომ კლინიკის მენეჯმენტის სარჩელი აბსოლუტურად უსაფუძვლო იყო.
„ამ შემთხვევაში ევექსი კლინიკების მენეჯმენტს აბსოლუტურად უსაფუძვლო სარჩელი ჰქონდათ წარდგენილ და ცდილობდნენ რომ გარკვეული ზემოქმედება მოეხდინათ ჟურნალისტურ თავისუფლებაზე, რასაც სასამართლო არ დაეთანხმა და მიღებულ იქნა ობიექტური გადაწყვეტილება“, - აცხადებს ამირან გიგუაშვილი.
„საქართველოს ჯანდაცვის ჯგუფის“ მოთხოვნა იყო ორი სახის, პირველი უკავშირდებოდა მათი აზრით იმ თითქოსდა ცილისმწამებლური ინფორმაციის უარყოფას, რომელიც გამოქვეყნდა „კომერსანტის“ საინფორმაციო პლატფორმაზე. სტატიებში აღინიშნებოდა ის არაკვალიფიციურობა და პრობლემების მთელი სპექტრი, რომელიც ევექსის კლინიკების საქმიანობასთან იყო დაკავშირებული და კომერსანტისგან ითხოვდნენ რეპუტაციული ზიანის ანაზღაურებას 100 000 ლარის ოდენობით.
მომჩივნის აზრით, ამ თითქოსდა ცილისმწამებლურმა კამპანიამ, რომელიც მიმართული იყო მათი კლინიკების „რეპუტაციის დაზიანებისკენ“, დააზარალა მათი საქმიანი იმიჯი.
„ჩვენ თავშივე მიგვაჩნდა, რომ წარმოდგენილი სარჩელი იყო დაუსაბუთებელი. „კომერსანტი“ ყოველთვის ყველა სტატიაში ხაზს უსვამდა ობიექტურობის მაღალ სტანდარტს და ხარისხს, ასევე სთავაზობდა ევექსის კლინიკების მენეჯმენტს, რომ საკუთარი პოზიციები დაეფიქსირებინათ გამოქვეყნებულ სტატიებთან დაკავშირებით. პლატფორმა ყოველთვის ღია იყო იმ კონტრარგუმენტების წარმოსადგენად რაც გააჩნდა „ევექსი კლინიკების“ მენეჯმენტს, რომ საზოგადოებისათვის გაეცნო, რითაც მან არ ისარგებლა. შესაბამისად, ჩვენ მიგვაჩნდა და დღესაც მიგვაჩნია, რომ ყველა სტატია, რაც გამოქვეყნდა, აკმაყოფილებდა ჟურნალისტური თავისუფლების ძირითად პრინციპებს, ასევე ობიექტურობის ხარისხს, რომელიც არის ერთ-ერთი მნიშვნელოვანი ფუნდამენტი ჟურნალისტური საქმიანობისთვის და რაც შეეხება ზარალის ანაზღაურებას, ამ ნაწილში ცალსახად მიგვაჩნდა, რომ არანაირი დამაჯერებელი მტკიცებულებები არ იყო წარმოდგენილი, რომელიც სასამართლოს მისცემდა შესაძლებლობას, რომ სარჩელი თუნდაც ნაწილობრივ დაეკმაყოფილებინა“, - ამბობს ამირან გიგუაშვილი.
„კომერსანტის“ ადვოკატის აზრით, მოსამართლემ ობიექტური გადაწყვეტილება მიიღო, რითაც კიდევ ერთხელ დამტკიცდა, რომ საქართველოში გამოხატვისა და სიტყვის თავისუფლების დაცვა პრიორიტეტია.
„გადაწყვეტილება სასამართლოს მიერ მიღებული იქნა ობიექტურად, კანონთან შესაბამისობაში და კიდევ ერთხელ ხაზგასმული იქნა, რომ ამ ქვეყანაში გამოხატვის და სიტყვის თავისუფლება არის ერთ-ერთი ყველაზე პრიორიტეტული უფლება, რომელიც საზოგადოების მონაპოვარია და შეიძლება ვიღაცას არ სიამოვნებდე მის შესახებ რაღაცა ინფორმაციის საჯარო სივრცეში გამოქვეყნება, მაგრამ ყველას აქვს იმის შესაძლებლობა და მათ შორის „ევექსი კლინიკებსაც“ ჰქონდა მიცემული შესაძლებლობა რადიო კომერსანტისა და კომერსანტის ვებ-გვერდისაგან, რომ გამოეყენებინა ეს პლატფორმა მათთვის მნიშვნელოვანი ინფორმაციის გამოსაქვეყნებლად , რაც მათ არ განახორციელეს და აქედან გამომდინარე ვფიქრობ, რომ ერთ-ერთ მნიშვნელოვანი საფუძველი სარჩელზე უარის თქმისა სწორედ ესეც იყო“, - აცხადებს ამირან გიგუაშვილი.
ადვოკატის აზრით, სასამართლოს ამ გადაწყვეტილების გასაჩივრებს აზრს მოკლებულია და ამბობს, რომ „ქვეყანაში, სადაც ვიღაც ცდილობს, რომ სასამართლოს გზით ამოუკეროს პირი ჟურნალისტებს, ვინც არ უნდა იყოს ეს, იქნება კორპორაცია, იქნება სახელმწიფო ინსტიტუცია თუ ა.შ. ის აუცილებლად წააგებს ამ ბრძოლას“.
ცნობისთვის, „საქართველოს ჯანდაცვის ჯგუფმა“ „კომერსანტის წინააღმდეგ სასამართლოში შეტანილ სარჩელში რამდენიმე სტატია მოიყვანა, მათ შორის „Georgian Capital-ის წარუმატებელი პროექტი - „საქართველოს ჯანდაცვის ჯგუფი“ არალიკვიდურობის გამო ლონდონის საფონდო ბირჟიდან ჩაიხსნა“, რომელიც 2020 წლის 11 აგვისტოს გამოქვეყნდა.
მედიაჰოლდინგ „კომერსანტის“ სამეთვალყურეო სამჭოს თავმჯდომარე გიორგი სამუშია ამბობს, რომ მისთვის მოულოდნელი არ ყოფილა სასამართლოს გადაწყვეტილება.
„კომერსანტი“ ყოველთვის იცავს ჟურნალისტიკის უმაღლეს სტანდარტებს. ჩვენ ვაშუქებთ ბიზნესსა და მთლიანად ეკონომიკაში მიმდინარე პროცესებს. შესაბამისად, ნებისმიერ შემთხვევაში, კომერსანტის ეთერი და ვებ პლატფორმა ყოველთვის ღიაა ნებისმიერი ბიზნესისთვის, თავისი პოზიციის დასაფიქსირებად. საკითხის სიმწვავის მიუხედავად, ნებისმიერ ბიზნესმენს შეუძლია „კომერსანტის“ პლატფორმით სარგებლობა. ჩვენი ამ ღიაობით, სამწუხაროდ, არ ისარგებლა „საქართველოს ჯანდაცვის ჯგუფმა“ და სარჩელი სასამართლოში შეიტანა. პირადად ჩემთვის და ჩვენი გუნდისთვის მოსამართლის ეს გადაწყვეტილება მოულოდნელი ნამდვილად არ ყოფილა“, - აცხადებს გიორგი სამუშია.