სასათბურე მეურნეობა ,,აგროსფეისმა” წელს მარწყვის პირველი მოსავალი მიიღო. კომპანიამ ოპერირება 2020 წელს მარნეულის მუნიციპალიტეტის სოფელ აზიზქენდში დაიწყო. როგორც კომპანიის დამფუძნებელი, მეწარმე თენგიზ სალუქვაძე ,,კომერსანტთან“ ამბობს, მარწყვის წარმოების იდეა პირველი ლოკდაუნის პერიოდში გაჩნდა, როცა პანდემიის გამო ვითარება გაურკვეველი იყო და ადგილობრივი ბაზრის მომარაგების მიმართულებით პრობლემა შეიქმნა.
სხვადასხვა სექტორში 30 წლიანი წარმატებული საქმიანობის შემდეგ „აგროსფეისის“ ბრენდით განსხვავებული, მაღალი ხარისხის პროდუქტის წარმოება დაიწყო და პირველი მოსავალი დახლებზე უკვე გამოჩნდა.
მიიღე ინფორმაცია უფრო სწრაფად „კომერსანტის“ Telegram-ზე.
,,მარწყვის წარმოების დაწყებამდე ბაზარი საფუძვლიანად შევისწავლეთ. მთავარი პირობა იყო, რომ გვეწარმოებინა პროდუქტი, რომელიც ადგილობრივ ბაზარზე იქნებოდა მოთხოვნადი და ხარისხით იმპორტულს კონკურენციას გაუწევდა. აქცენტი „სან ანდრეასის“ ჯიშის მარწყვზე გავაკეთეთ, რომელიც სასარგებლო ხილია და გემური თვისებებით გამოირჩევა. ჯერჯერობით ადგილობრივ ბაზარზე ვყიდით, მაგრამ გატანაზეც ვფიქრობთ, უფრო ალბათ არაბეთის ქვეყნებში, მაგრამ ჯერ გაურკვეველი პერსპექტივაა. პროდუქტის შეძენა შესაძლებელია ,,აგროჰაბში“, „გუდვილისა“ და „ნიკორას“ ქსელებში, ხოლო სულ მალე იგი ყველა ქსელური მაღაზიის დახლზე იქნება განთავსებული. ვფიქრობ, რომ მარწყვის წარმოებას საქართველოში დიდი პოტენციალი აქვს. თუმცა ჯერჯერობით ამ მიმართულებით ბაზარზე არის გარკვეული პრობლემა, რაც ძირითადად ქვეყნის მწირი ეკონომიკური შესაძლებლობით არის განპირობებული. წარმოებისა და ბიზნესის განვითარება ამ მხრივ დიდ გარღვევას მოახდენს. არა მარტო მარწყვს, ქვეყანაში ყველა აგრარულ პროდუქტს აქვს წარმოების დიდი პოტენციალი, მაგრამ ამისთვის მთავარი პირობაა ხელისშემშლელი ფაქტორები აღმოუფხვრას და ბიზნესს განვითარების მეტი შესაძლებლობა მიეცეს“, - აცხადებს თენგიზ სალუქვაძე.
მისი თქმით, პროდუქტი ჯერჯერობით მთლიანად ადგილობრივ ბაზარზე იყიდება, თუმცა სამომავლოდ ექსპორტზეც ფიქრობენ, ძირითადად არაბული ქვეყნების მიმართულებით.
,,წარმოების ზრდას ვგეგმავთ, რის შემდეგაც სერიოზულად დავიწყებთ ფიქრს პროდუქტის უცხოურ ბაზრებზე გატანაზე. ჯერჯერობით კი მთლიანად ადგილობრივ ბაზარზე ვართ ორიენტირებული. ჩვენი მიზანია, რომ მარწყვი ვაწარმოოთ უწყვეტ ციკლში, რათა მისი მოხმარება შესაძლებელი გახდეს როგორც სეზონურ, ისე არასეზონურ პერიოდში. სამომავლოდ ექსპორტზეც ვიფიქრებთ, აქცენტს სავარაუდოდ არაბულ ქვეყნებზე გავაკეთებთ, მაგრამ ჯერ ამ მიმართულებით მუშაობა არ დაგვიწყია, უფრო შორეულ პერსპექტივად განვიხილავთ, მანამდე ადგილობრივ ბაზარზე პოზიციები უნდა გავიმაგროთ და გავფართოვდეთ“, - ამბობს მეწარმე.
რაც შეეხება სასათბურე მეურნეობასთან დაკავშირებულ გამოწვევებს, სალუქვაძე ერთ-ერთ მთავარ დაბრკოლებად ენერგომატარებლებზე მაღალ ხარჯს მიიჩნევს და ამბობს, რომ მისი წილი საბოლოო პროდუქციის თვითღირებულებაში 70%-მდეა, რაც აგროწარმოების განვითარებას მნიშვნელოვნად აფერხებს.
ცნობისთვის, სასათბურე მეურნეობა ,,აგროსფეისი“ 5 500 კვადრატულ მეტრ ფართობზეა განთავსებული და წლიურად, 40 ტონა მარწყვის წარმოებაა შესაძლებელი.
კომპანია სახელმწიფო პროგრამა ,,იაფი აგროსესხის“ ბენეფიციარია. ჯამურად, 1,5 მილიონი ლარის ინვესტიცია განხორციელდა.
სათბურში ამ ეტაპზე 10 ადამიანია დასაქმებული.
მარი ჩიტაია