ბრიტანული მოდის წამყვანმა ბრენდმა Burberry-მ 2021 წელი საქართველოში 1 715 521 ლარის მოგებით დაასრულა. „ბარბერი საქართველოს“ (შპს ლიდერ სისტემ)  შემოსავალი 2021 წელს 1 715 521 ლარი იყო. საანგარიშო პერიოდში კომპანიის საკუთრებაში 5 მლნ ლარის აქტივები იყო.

შპს „ლიდერ სისტემი“ ბრიტანული კომპანია Burberry Limited-გან ფლობს საქართველოს ტერიტორიაზე Burberry-ის ბრენდის ექსკლუზიური წარმომადგენლობის უფლებას, რაც გულისხმობს არამხოლოდ Burberry-ის ბრენდული მაღაზიების ფლობისა და ოპერირების, არამედ, კომპანია Burberry-ის სახელის, ლოგოტიპისა და სხვა სავაჭრო ნიშნების გამოყენების უფლებასაც.

როგორც ირკვევა, კომპანიის პროდუქციის ძირითადი ნაწილი თბილისში იყიდება. მომზადებულ დოკუმენტში ვკითხულობთ, რომ 2018-2019 წლებში განხორციელდა ხარჯების ოპტიმიზაციის პროგრამა და 2019 წელს დაფიქსირდა - 870 531 ლარი მოგება, თუმცა მათი ინფორმაციით, 2020 წელს პანდემიამ და სავალუტო კურსის რყევამ კომპანიას უდიდესი ფინანსური ზარალი მიაყენა. ამის საერთო შედეგიც ფინანსურ ანგარიშგებაში 3 092 644 ლარის ზარალით გამოისახა.

Burberry-ის მაღაზია თავისუფლების მოედანზე, თბილისის საკრებულოს შენობის პირველ სართულზეა განთავსებული. კომპანიამ იჯარაში 2021 წელს 600 418 ლარი გადაიხადა. ადმინისტრაციულმა და სხვა საოპერაციო ხარჯებმა 1 025 565 ლარი შეადგინა, ხოლო თანამშრომელთა ხელფასებში კომპანიამ 687 448 ლარი დახარჯა.

შპს ,,ლიდერ სისტემი“ საქართველოში 2011 წლიდან ოპერირებს. კომპანიის დამფუძნებელი და 100% წილის მფლობელია სომხეთის მოქალაქე ჰაიკ ხაჩატრიანი. კომპანიის ძირითად საქმიანობას წარმოადგენს სამშენებლო მასალებით, ფეხსაცმლით, ჩანთებითა და ტანსაცმლით საცალო ვაჭრობა.