კომპანია JUMPO-მ სატრანსპორტო სერვისების ახალი აპლიკაცია Just-ის შექმნა დააანონსა. აპლიკაცია ამ ეტაპზე ოთხ ძირითად სერვისს — ტაქსს, დელივერს, საქალაქთაშორისო მგზავრობა/დამგზავრებას, ამანათების და მცირე ტვირთების გადაზიდვას აერთიანებს.
JUST-ის მობილური აპლიკაციის საშუალებით, მომხმარებელი მოიძიებს სასურველ სერვისს პროვაიდერს. SMS-ის ან სატელეფონო ზარის საშუალებით აპლიკაციიდანვე დაუკავშირდება მას. სურვილის შემთხვევაში აპლიკაციაშივე შეძლებს შეკვეთა/ჯავშნის გაფორმებას და საბანკო ბარათის მეშვეობით საფასურის გადახდას. აპლიკაცია მომხმარებელს საფასურის ადგილზე ყოველგვარი წინაპირობის გარეშე გადახდასაც სთავაზობს.
„კომერსანტი“ დეტალებისთვის Just- ის აღმასრულებელი დირექტორს კობა პატარიძეს დაუკავშირდა. მისი განცხადებით, ამ დროისთვის რეორგანიზაცია მიმდინარეობს და მათი სურვილია JUST-ის JUMPO-ს პლატფორმისგან ცალკე კომპანიად გამოყოფა. მისივე თქმით, აპლიკაცია JUST-ი არა მხოლოდ საქართველოს, არამედ გლობალურ ბაზარზეა გათვლილი.
4 წელია რაც პლატფორმა Jumpo- ზე ვმუშაობთ და სატრანსპორტო სერვისების პროდუქტის შესაქმნელად მას ვიყენებთ, იტალიელებთან ერთად Jumpo- ს ბაზაზე შევქმენით ახალი პროდუქტი Just, ეს არის აპლიკაცია, სადაც ყველა სატრანსპორტო სერვისია გაერთიანებული.
ამ ტიპის სტარტაპი საქართველოში ჯერ არ გაკეთებულა, თავიდან იტალიელებთან ერთად ვაკეთებდით და ახლა სრულიად ქართულ რელსებზე გადმოგვყავს.
2-3 თვე აპლიკაცია სატესტო რეჟიმში იმუშავებს, იტალიაშიც გვყავს მძღოლების და პერსონალის გარკვეული კონტიგენტი და სამომავლოდ ნიუ-იორკში შესვლასაც ვგეგმავთ.
ამჟამად რეორგანიზაციის პროცესში ვართ, ინვესტორები უნდა დაგვემატოს, ასევე ვგეგმავთ ბევრ სიახლესაც.“ - აღნიშნა კობა პატარიძემ.
პატარიძის განმარტებით აპლიკაცია Just – ს განსხვავებული მიდგომა და დაბალი საკომისიო გამოარჩევს. მისივე განმარტებით თუ ტაქსის მძღოლები სხვა კომპანიებს მოგების 35% უხდიან, Just- ის შემთხვევაში ეს გაცილებით ნაკლებია.
„ორმაგი სტანდარტით ვმუშაობთ, მძღოლსაც და მომხმარებელსაც თავისუფლებას ვაძლევთ, ჩვენთან იმდენად მცირე გადასახადია, რომ ფაქტობრივად გადასახადად არც ითვლება. ამ გადასახადს მძღოლი იხდის, მომხმარებლისგან საკომისიოს იმ შემთხვევაში ვიღებთ, თუ იგი მგზავრობას აზღვევს.
როდესაც მგზავრობა დაზღვეული არ არის, ანუ წინასწარ არ გაქვთ მგზავრობის საფასური გადახდილი, შეიძლება ან თქვენ არ მიხვიდეთ, ან მძღოლი არ დაგხვდეთ ადგილზე. ამ ორ თავისუფლებას ვტოვებთ — მძღოლმაც იცის, რომ ეს არის გაურკვეველი კლიენტი.
რაც შეეხება ე.წ. გადახდილ კლიენტს , რომელსაც წინასწარ აქვს თანხა გადახდილი ის აუცილებლად მივა და შესაბამისად ის თანხაც მძღოლამდე აუცილებლად მიდის, მძღოლიც ვალდებულია დახვდეს, იგივე სტანდარტი მოქმედებს გადაზიდვებზე და დელივერზეც“ - აღნიშნა კობა პატარიძემ.
პატარიძის განმარტებით, ამ ეტაპზე კაპიტალიზაციის შეფასება მიმდინარეობს და საინვესტიციო თანხა დაახლოებით ნახევარმილიონ დოლარს შეადგენს. მისი თქმით, გლობალურ ბაზარზე კომპანიას დიდი ინვესტიციები სჭირდება და ამ საკითხზე ინვესტორებთან მოლაპარაკებაც მიმდინარეობს, რაც დაახლოებთ 2-3 თვე გაგრძელდება.
თაკო კვაჭანტირაძე