მილიარდერმა ინჟინერმა ილონ მასკმა განაცხადა, რომ მისი კომპანია Neuralink მომავალი წლიდან ადამიანის ტვინში მიკროჩიპის ჩანერგვაზე დაიწყებს მუშობას.
Neuralink ბიოტექნოლოგიური სტარტაპია, რომელიც ილონ მასკმა, მაქს ჰოდაკთან ერთად, 2016 წელს დააფუძნა. კომპანიის მთავარი მიზანი ზურგის ტვინის დაზიანებით გამოწვეული დამბლისა და ნევროლოგიური დარღვევების მქონე ადამიანების დახმარებაა. Neuralink მუშაობს ისეთი მიკროჩიპების შექმნასა და დახვეწაზე, რომელთა მეშვეობითაც შესაძლებელი იქნება ნეირონების სტიმულირება. ეს საშუალებას მისცემს ნევროლოგიური დაავადებების მქონე ადამიანებს, რომ კიდურების გამოყენების გარეშე, ტვინის მეშვეობით მართონ სხვადასხვა ელექტრონული მოწყობილობა.
თავდაპირველად, მასკი ჩიპების ადამიანებზე გამოცდას 2020 წლის ბოლოს გეგმავდა, მაგრამ გარკვეული მიზეზების გამო ამის გადადება მოუხდა. Wall Street Journal-ისთვის მიცემულ ინტერვიუში მილიარდერმა განაცხადა, რომ 2022 წელს კომპანიამ შესაძლოა დაიწყოს მიკროჩიპების ადამიანების თავის ტვინში იმპლანტაცია, თუმცა, ამისათვის საჭიროა FDA-ს (Food and Drug Administration) თანხმობა.
მიუხედავად იმისა, რომ ჩიპების ადამიანებზე გამოცდა ჯერ არ დაწყებულა, Neuralink წლების განმავლობაში აქტიურად მუშაობდა ჩიპების იმპლანტაციაზე ცხოველების ტვინში. 2020 წლის ზაფხულში გავრცელდა ვიდეო, სადაც Neuralink-ის ჩიპის ტესტირება პირველად ღორის თავის ტვინზე განხორციელდა. მიმდინარე წლის აპრილში ინტერნეტსივრცე მოიცვა მაიმუნის ვიდეომ, რომელიც კომპიუტერში პინგ-პონგს თამაშობდა და ამისათვის მხოლოდ გონებას იყენებდა, რასაც Neuralink-ის ჩიპის საშუალებით ახერხებდა.
Wall Street Journal-თან ინტერვიუში მასკს ჩიპის მაიმუნებზე გამოცდის ეფექტურობაზეც დაუსვეს კითხვა. მილიარდერის განცხადებით, მაიმუნებზე ტესტირება წარმატებით მიმდინარეობს და კომპანია მუშაობს იმის დასადასტურებლად, რომ ჩიპი უსაფრთხო და სანდოა, მისი ამოღება კი გართულებების გარეშეა შესაძლებელი.
მიკროჩიპის საშუალებით, ტვინის ნეირონებს ექნებათ ნებისმიერ კომპიუტერულ სერვისთან დაკავშირების შესაძლებლობა. შესაბამისად, როცა ადამიანი იფიქრებს ხელის ან ფეხის მოძრაობაზე, მიკროჩიპი მოახდენს ამ ფიქრების კოდირებას და Bluetooth-ის საშუალებით გაუგზავნის მას ელექტრონულ მოწყობილობას. როგორც Neuralink-ის საიტზე ვკითხულობთ, დროთა განმავლობაში ადამიანები ისწავლიან მოწყობილობების „ვირტუალური მაუსით“ კონტროლირებას. ტექნოლოგიის გაუმჯობესებასთან ერთად კი, შესაძლებელი გახდება ერთდროულად რამდენიმე მოწყობილობის, მათ შორის კლავიატურისა და ჯოისტიკის კონტროლი.
წყარო: businessfeed.ge