„მნიშვნელოვანია, რომ შუა დერეფანმა გრძელვადიანი კონკურენტუნარიანობა შეინარჩუნოს. ამისთვის საჭიროა მაღალ დონეზე კოორდინაცია, რათა ჩვენი სატრანსპორტო გადაზიდვები იყოს კომფორტული, უფრო მიმზიდველი საერთაშორისო აქტორებისთვის, რათა ქვეყანამ მიიღოს დამატებითი შემოსავლები ამ მიმართულებიდან. 2022 წელს შუა დერეფანში სატვირთო ბრუნვა 30 პროცენტით გაიზარდა. ჩვენ ვფიქრობთ, რომ გაუმჯობესებული სატრანსპორტო ინფრასტრუქტურით, მათ შორის, ადმინისტრირებით, შევძლებთ, გრძელვადიან პერსპექტივაში, შუა დერეფანში ტვირთების შენარჩუნებას,“ - განაცხადა ვიცე-პრემიერმა, ეკონომიკისა და მდგრადი განვითარების მინისტრმა ლევან დავითაშვილმა.

გადამზიდავი კომპანია CMA CGM Georgia-ს გაყიდვების მენეჯერი ჰამლეტ ჭანტურია „კომერსანტთან“ საუბრისას აღნიშნა, რომ საქართველოს გავლით ტვირთბრუნვა მნიშვნელოვნადაა გაზრდილი და ამ ტვირთნაკადის შენარჩუნება შესაძლებელია, რადგან კომპანიებმა, რომლებიც ტვირთებს ჩრდილოეთის მიმართულებით ატარებდნენ, დაინახეს რომ ხარჯი საქართველოდან 1.5-ჯერ ნაკლებია.

„ჩვენ რაც უფრო უკეთესად გვექნება ინფრასტრუქტურა გამართული მით უფრო დიდი შანსია, რომ ის ტვირთნაკადი რაც დღეს გვაქვს მომავალშიც შევინარჩუნოთ. რასაც საქართველოს ბაზარზე არსებული კომპანიები, საზღვაო ხაზები, რკინიგზა და სხვა აკეთებს, ის არის რომ ეს არ იყოს ერთჯერადი და როცა ბაზრები გაიხსნება ტვირთნაკადები ძველ მიმართულებებზე დაბრუნდეს. ტვირთის ბუნებაც ის არის, რომ ნახოს უკეთესი გზა, რასაც ტრანსპორტირების ნაკლები თანხები დასჭირდება. ჩვენ როგორც საზღვაო ხაზები, რასაც ვაკეთებთ, არის ის რომ ტვირთები რომლებიც გადიოდა ჩრდილოეთის მიმართულებით, რაღაც ნაწილი რა თქმა უნდა ისევ დაუბრუნდება ძველ გზას, რადგან თავიანთი მიდგომები აქვთ, მაგრამ ძირითადი ნაწილი მაინც დარჩება, რადგან ხარჯი არ არის ისეთი ძვირი როგორიც ჩრდილოეთ მიმართულებას აქვს. იმ კომპანიებმა, რომლებიც ჩრდილოეთის მიმართულებით ატარებდნენ ტვირთებს დაინახეს, რომ ხარჯი საქართველოდან 1.5-ჯერ ნაკლებია, მაგრამ არსებობს რაღაც სეგმენტი რომლებსაც მაინც საკუთარი შეხედულებები აქვთ და ურჩევნიათ ის ძველი გზა.

ბაზარი ამბობს, რომ თუ ინფრასტრუქტურა ცოტათი მაინც უკეთესი იქნება, ტერმინალებიდან დაწყებული მოწესრიგებული ლიანდაგებით დამთავრებული, ახლა რაც მოვიზიდეთ ეს ტვირთებიც დარჩება და კიდევ დაემატება. ამას გარდა პორტები ცალკე მუშაობენ რკინიგზასთან, რათა კოლაბორაცია გავაკეთოთ და წყვეტა არ მოხდეს. მართალია გეოპოლიტიკური მდგომარეობა არც ისე სახარბიელოა, თუმცა ამან საშუალება მოგვცა მნიშვნელოვანი სატრანზიტო დერეფანი გავმხდარიყავით. არის ლოგისტიკური და ინფრასტრუქტურული პრობლემები, რისი მოგვარებაც კიდევ უფრო დიდი წინსვლის შანს მოგვცემს“, — აღნიშნა ჰამლეტ ჭანტურიამ.

2022 წლის პირველ ნახევარში საქართველოში ჯამური ტვირთბრუნვა, 2021 წლის იმავე პერიოდთან შედარებით, 5%-ითაა გაზრდილი. აღნიშნულ პერიოდში საავტომობილო გზით - 13.5 მილიონი ტონა ტვირთი, რკინიგზით კი 6.8 მილიონი ტონა ტვირთი გადაიზიდა. 2022 წლის II კვარტალში სატრანზიტო გადაზიდვები 29%-ით გაიზარდა. ზრდა, უმეტესწილად, თურქეთზე, რუსეთზე, უზბეკეთსა და ყაზახეთზე მოდის. ეკონომიკის სამინისტროს ინფორმაციით, 2022 წელს შუა დერეფანში სატვირთო ბრუნვა 30 პროცენტით გაიზარდა.