„მიუხედავად იმისა, რომ ჯერ მონაცემები სექტორების და პროდუქციის მიხედვით ჩაშლილი არ არის, ვფიქრობ რომ ეს სეზონი თხილის ექსპორტის ზრდით არის დატვირთული, შესაბამისად სწორედ აქედან გამომდინარეობს სოფლის მეურნეობის სექტორში ექსპორტის ზრდაც,“ - ამის შესახებ რადიო „კომერსანტის“ გადაცემაში, „კომერსანტის დილა“ ექსპორტის განვითარების ასოციაციის გამგეობის თავმჯდომარემ გვანცა მელაძემ ისაუბრა. მისი თქმით საქართველოს ექსპორტის უდიდესი ნაწილი დამოკიდებულია ფეროშენადნობზე, შესაბამისად ნედლეულის ექსპორტიც აქედან ბალანსდება, რაც ერთის მხრივ კარგია, რადგან ეს არის ადგილობრივი ექსპორტი და არა რეექსპორტი.
„ზოგადად ჩვენი ნედლეული არის იშვიათი და მასზე მსოფლიოში დეფიციტია, ასევე საგაზაფხულო სამუშაოებისთვის იმატებს სასუქების ექსპორტიც, რაც ერთ-ერთი დიდი სასაქონლო პოზიციაა, შესაბამისად ეს სასაქონლო კოდი არის იანვარ -თებერვალში ექსპორტზე გასული.“ - აღნიშნა გვანცა მელაძემ.
რაც შეეხება ეროვნული ვალუტის გამყარებას, მელაძე აღნიშნავს, რომ თეორიაში ლარის გამყარება ექსპორტზე უარყოფით გავლენას ახდენს, თუმცა თუ მაკროეკონომიკურად შევხედავთ, გამომდინარე იქიდან, რომ გვაქვს უარყოფითი სავაჭრო ბალანსი, უფრო მეტს ვხარჯავთ დოლარში ვიდრე ვყიდულობთ ლარში, აქედან გამომდინარე მმაკროეკონომიკურად საქართველოზე ლარის გამყარება დიდად უარყოფითად არ აისახება.
„თუმცა იმ კომპანიებს, რომლებსაც კურსის სხვაობა დაზღვეული არ აქვთ, შესაძლოა, რომ პრობლემები შეექმნათ. მაგალითად ის ექსპორტიორი კომპანიები, რომლებსაც აქვთ შემოსავალი დოლარში, მაგრამ მათი სესხი, კრედიტი არ არის დოლარში და არის ლარში ეს ფაქტორი მეწარმეზე ნეგატიურად აისახება,“ - აღნიშნა გვანცა მელაძემ.
რაც ეხება ბაზრების დივერსიფიცირებას, გვანცა მელაძე აღნიშნავს, რომ წელს რუსეთზე დამოკიდებულება კიდევ უფრო გაიზრდება, რადგან ბევრი კომპანიაა, რომელიც რუსეთში ალკოჰოლის ლიცენზიას ელოდება, გარდა ამისა კავშირები ბევრად შემჭიდროვდა და რუსეთიდან მოთხოვნა გაიზარდა.
„აქედან გამომდინარე ალკოჰოლურ სექტორში ვარდნას არ ველოდებით , გარდა ამისა ვხედავთ ტენდენციას, რომ ინფლაციის და ლოგისტიკური ხარჯების ზრდის გამო დივერსიფიცირება გაძნელდა, ასევე მარკეტინგზე უფრო დიდი ბიუჯეტია საჭირო, შესაბამისად ამ მონაცემებზე დაყრდნობით დივერსიფიცირების ზრდას არ ველოდებით“ , - აღნიშნა გვანცა მელაძემ.
თაკო კვაჭანტირაძე