სპორტული დანიშნულების ავტომობილის მიჩნევის წესისა და კრიტერიუმების შესახებ კანონში ცვლილებები განხორციელდა. ამ ცვლილებების მიხედვით სპორტული დანიშნულების ავტომობილს აეკრძალა გადაადგილება 23:00-დან დილის 7 საათამდე. გამონაკლისს წარმოადგენს ის შემთხვევები, როცა სპორტული ავტომობილი შეჯიბრზე  ან პროფილაქტიკური სამუშაოების ჩასატარებლად გადაადგილდება.

აღნიშნულ ცვლილებებს საავტომობილო ფედერაციის ვიცე-პრეზიდენტი მევლუდ მელაძე დადებითად აფასებს. „კომერსანტთან“ საუბრისას მელაძემ განაცხადა, რომ ეს კანონი მხოლოდ სარბოლო ავტომობილებს ეხება, აქ სპორტული ავტომობილები - Ferrari და Lamborghini არ იგულისხმება.

„ახალი კანონის მიხედვით, სპორტსმენებს  სპეციალური შეღავათები დაუწესდათ. თუ ისინი სპორტული დანიშნულების ავტომობილს სარბოლოდ ჩამოიყვანენ, განბაჟებისთვის სიმბოლურად 100 ლარს გადაიხდიან და მანქანა ტექდათვალიერებასაც არ გაივლის, რადგან ასეთი ავტომობილები თავიდან ბოლომდე გადაკეთებულია. კომპრომისზე წავიდა სახელმწიფო, სპორტსმენებისთვის შეღავათები დაუშვა. სამაგიეროდ მოითხოვა, რომ სპორტულმა ავტომობილებმა დღის საათებში ქუჩაში არ იღმუვლონ“, — აცხადებს მევლუდ მელაძე.

ამასთან ერთად, მთავრობის დადგენილებაში აღნიშნულია, რომ მექანიკური სატრანსპორტო საშუალების სავალდებულო ტექნიკური შემოწმება და სპორტული დანიშნულების ავტომობილად მიჩნევა ფედერაციის მხრიდან ხორციელდება. სპორტული დანიშნულების ავტომობილად მიჩნეული ყველა სატრანსპორტო საშუალება კი შსს მომსახურების სააგენტოში სავალდებულო რეგისტრაციას ექვემდებარება.

მოამზადა მაკა ბიბილაშვილმა