კონკურენციის სააგენტო საწვავის ბაზრის მონიტორინგის 2022 წლის იანვარ-ივლისის პერიოდის ფარგლებში მიღებული შედეგების შესაბამისად მოკვლევას იწყებს, რისი მიზანიც იმის დადგენაა, ხომ არ აქვს მსხვილი კომპანიების მხრიდან ადგილი კონკურენციის კანონმდებლობის დარღვევას.
„კონკურენციის ეროვნული სააგენტო, საქართველოს პრემიერ-მინისტრის რეკომენდაციის და საწვავის ბაზრის მონიტორინგის 2022 წლის იანვარ-ივლისის პერიოდის ფარგლებში მიღებული შედეგების შესაბამისად მოკვლევას დაიწყებს.
მოკვლევის მიზანია გავარკვიოთ, განსაკუთრებით მსხვილი კომპანიების მხრიდან, აქვს თუ არა ადგილი კონკურენციის კანონმდებლობის დარღვევას. ჩვენ მიერ წარმოდგენილ 2022 წლის 7 თვის მონიტორინგის ანგარიშში ნათლად ჩანს, რომ კონკრეტულ კომპანიებს საფასო კონკურენტული უპირატესობა გააჩნდათ, თუმცა აღნიშნული საცალო ბაზარზე სათანადოდ არ ასახულა. ამ კუთხით მეტი გამჭვირვალობის შეტანა და საზოგადოების მიერ დასმულ შეკითხვებზე პასუხის გაცემა არის მოკვლევის მიზანი და მთავარი ამოცანა.
მონიტორინგის ფარგლებში მიღებული შედეგების თანახმად რუსეთიდან იმპორტირებული საწვავის შემთხვევაში იმპორტის დონეზე და რუმინეთიდან იმპორტირებული საწვავის შემთხვევაში საბაჟო საწყობის თვითღირებულების გათვალისწინებით კონკრეტულ კომპანიებს გააჩნდათ ფასში კონკურენტული უპირატესობა, თუმცა აღნიშნული ასახვა საცალო ბაზარზე სათანადოდ არ მომხდარა“, - აცხადებს კონკურენციის სააგენტოს ხელმძღვანელი ირაკლი ლექვინაძე.
მისი თქმით, ბოლო ერთი კვირაა, საქართველოში, საწვავის ბაზარზე გაიაფების ტენდენციები დაწყებულია, თუმცა ადგილობრივი ვალუტის კურსის გამყარების და საერთაშორისო ბაზარზე ნავთობზე ფასის შემცირების ტრენდის გათვალისწინებით კლება აგვისტოშიც გაგრძელდება.
შეგახსენებთ, რომ გუშინ პრემიერ-მინისტრმა მთავრობის სხდომაზე განაცხადა, მან რეკომენდაციით მიმართა კონკურენციის სააგენტოს, დაიწყოს მოკვლევა და შეამოწმონ იმპორტიორების კეთილსინდისიერება, რამდენად სწორად ხდება კონკურენციის პირობების დაცვა.
„გვაქვს ჩვენ განცდა იმისა, რომ შესაბამისად არ ჰპოვა ასახვა საწვავის ფასებმა და არ მოხდა საწვავის ფასების პროპორციულად დაკლება, ამიტომ, საჭიროა, უფრო გავააქტიუროთ მუშაობა საწვავის იმპორტიორებთან“, - განაცხადა ირაკლი ღარიბაშვილმა.
მისი თქმით, ეკონომიკისა და ფინანსთა მინისტრები უკვე შეხვდნენ საწვავის იმპორტიორებს.
„ჩვენ აქტიურად ვაკვირდებით საწვავის ფასებს საქართველოში. მჭიდრო კოორდინაციაში ვართ კონკურენციის სააგენტოს ხელმძღვანელობასთან. მე დღეს დილით მქონდა საუბარი მათთან. იმის მიუხედავად, რომ ლარი გამყარდა, ასევე საწვავის ფასები პლაცზე არის დაკლებული, ქვევით წამოვიდა ფასები. ჯერ კიდევ გვაქვს ჩვენ განცდა იმისა, რომ შესაბამისად არ ჰპოვა ასახვა საწვავის ფასებმა და არ მოხდა საწვავის ფასების პროპორციულად დაკლება, ამიტომ, საჭიროა, უფრო გავააქტიუროთ მუშაობა საწვავის იმპორტიორებთან. მე რეკომენდაციით მივმართე კონკურენციის სააგენტოს, დაიწყონ მოკვლევა და შეამოწმონ იმპორტიორების კეთილსინდისიერება, რამდენად სწორად ხდება კონკურენციის პირობების დაცვა და ხომ არ არის რაიმე გადახრა და კეთილსინდისიერების დარღვევა. რა თქმა უნდა, ჩვენ გავაგრძელებთ მუშაობას. შეგვპირდნენ იმპორტიორები, რომ იმის მიუხედავად, რომ მათ დააკლეს ფასი ივლისში, ასევე აგვისტოში დააკლეს 10-10 თეთრით. კიდევ უფრო მეტად აპირებენ დაკლებას, ჯამში 20-30 თეთრით დააკლებენ ფასებს აგვისტოს ბოლომდე, მაგრამ უფრო მეტი გამჭვირვალობაა საჭირო. ჩვენს მოქალაქეებს მაქსიმალურად დეტალური ინფორმაცია უნდა მივაწოდოთ, რა მარჟებით მუშაობენ, რამდენია მათი მოგება და ა.შ. მთავრობა ყველაფერს აკეთებს იმისთვის, რომ ლარი იყოს სტაბილური და მოგეხსენებათ, ბოლო პერიოდში, როგორც მოგეხსენებათ, ძალიან გამყარდა ეროვნული ვალუტა. ამ და სხვა ფაქტორების გათვალისწინებით, ჩვენ მოვუწოდებთ იმპორტიორებს, რომ უფრო მეტი კოორდინაცია იქონიონ მთავრობასთანაც და მეტი კომუნიკაცია ჩვენს ხალხთან. ამიტომ, ამ საკითხს ჩვენ ეკონომიკურ გუნდთან ერთად დავაკვირდებით და მოგვიანებით კიდევ დამატებით ინფორმაციას მივაწვდით ჩვენს ხალხს, - განაცხადა პრემიერმა.