კონკურენციის სააგენტოს მიერ 1 თვის წინ გაკეთებულ განაცხადს, რომ მსხვილ კომპანიებს საწვავზე ფასის შემცირების რესურსი ჰქონდათ, არც მთავრობის მხრიდან მოჰყოლია რეაგირება და არც ბიზნესიდან -  ფასების დინამიკა ფაქტობრივად უცვლელია. ამ მხრივ ვერც   ლარის კურსის გამყარებამ მოახდინა გავლენა. ბოლო 1 თვეში არაბრენდირებულებმა 5-10 თეთრით გააიაფეს საწვავი, ბრენდირებულებმა  - 20 თეთრით, თუმცა ამას მოსახლეობისთვის მცირე შეღავათიც არ მოუხდენია.

ამ დროისთვის საცალო ქსელში 1 ლ. ბენზინის ფასი 3,65 ლარია, როცა 1 თვის წინ 3,85 ლარი ღირდა. რაც შეეხება დიზელის ფასს, 4,15 ლარის დონეზეა, მაისში ეს მაჩვენებელი 4,10 თეთრს შეადგენდა.

იმპორტიორები დამოკიდებულებას არ ცვლიან და აცხადებენ, რომ ბაზარი ფასის კლების შესაძლებლობას მოკლებულია, ვინაიდან  გლობალურ ბაზრებზე ნავთობპროდუქტები ძვირდება.

კომპანია ,,სენტას“ დამფუძნებელი ზაალ იაკობიძე საფასო ცვლილებას ჯერჯერობით არ ვარაუდობს.

,,კონკურენციის სააგენტოს მიერ ანგარიშის წარდგენის შემდეგ ბენზინი მცირედით გაიაფდა, მაგრამ დიზელის საწვავზე ცვლილება არ ასახულა. ამის მიზეზი გლობალურ ბაზრებზე მაღალი ფასებია. საწვავის გაიაფების შესაძლებლობა დღესდღეობით ფაქტობრივად არ არის, იაფი საწვავი არ შემოდის, ,,პლატცი“  მაღალ ნიშნულზეა, რუსეთიდან ცოტა იაფად რომ განხორციელებულიყო იმპორტი, ბენზინის ფასში მცირე სხვაობასაც ვერ მოვახდენდით. ადრე გაცილებით ნაკლებ ფასად თურქმენეთიდან შემოდიოდა, მაგრამ დღესდღეობით ისეთი მაღალი ,,პლატცია“, რომ თურქმენული ნავთობპროდუქტების ღირებულება რუსულ საწვავის ფასს აღემატება. საკმაოდ რთული მოცემულობაა, რის გამოც  საფასო ცვლილებას კლების მიმართულებით ჯერჯერობით არ ველოდებით“, - ამბობს ,,კომერსანტთან“ ზაალ იაკობიძე.

რაც შეეხება ,,პლატცის“ ფასს, 13 ივნისის მდგომარეობით, 1 ტონა ბენზინი 1350 დოლარია, ხოლო ამავე მოცულობის დიზელის ღირებულება 1430 დოლარს შეადგენს.

საწვავის ფასთან დაკავშირებით ფინანსისტების პოზიცია განსხვავებულია. ისინი ღიად აცხადებენ, რომ  ქართულ ბაზარზე დიდი ოლიგოპოლიაა, რასაც მაღალი რანგის ჩინოვნიკების მხრიდან დიდი ხელშეწყობაც აქვს. მეტიც, ფინანსისტი მერაბ ჯანიაშვილი ამბობს, რომ დამოკიდებულება არ იცვლება და ფასებს სავარაუდოდ კვლავ კარტელური გარიგებების საფუძველზე ადგენენ.

,,მეეჭვება, პრემიერს  პრობლემა პირველად დაენახა. ათეულობით წლებია ამ ბაზარზე სიტუაცია უცვლელია.  არ ხდება ჯანსაღი კონკურენციის შედეგად ფასწარმოქმნა და იმ პროცესების ადეკვატური ასახვა, რასაც ადგილი აქვს გლობალურ ბაზრებზე.  ადრე, სანამ ,,ოცნება“ მოვიდოდა ქვეყნის სათავეში,  წინასაარჩევნო კვლევაში წერდნენ, რომ ბაზარზე ოლიგოპოლიაა, შემდეგ იგივე განმეორდა ეკონომიკურ კვლევაშიც, რაც კონკურენციის სააგენტომაც დაადასტურა და კომპანიები  36 მილიონითაც დააჯარიმეს, მაგრამ მერე ჩამოაწერეს ეს თანხა. არ ვიცი რა გარიგება მოხდა ბიზნესსა და ჩინოვნიკებს შორის - არც ფასი გადაახდევინეს და უცებ გაქრა ის საკითხიც, რომ ოლიგოპოლიაა. კონკურენციის სააგენტოს 1 თვის წინანდელი  კვლევით კი ყველაფერი კარგადაა. ლექვინაძემ  და ღარიბაშვილმა გაარკვიონ ერთმანეთში რომელი უფრო მართალია. სახელმწიფოს ჩინოვნიკები თუ არაფერს არ გააკეთებენ, ეს პრობლემა ვერ მოგვარდება“, - აცხადებს მერაბ ჯანიაშვილი.

კონკურენციის სააგენტოს ინფორმაციით, ბაზარზე დაკვირვება გრძელდება, დამატებითი მონიტორინგი ტარდება და თანდათან გამოიკვეთება, გახდება თუ არა მეტი რეაგირება  საჭირო.

მარი ჩიტაია