საავტომობილო საწვავის ბაზარზე ფასების კლების პროცესი გრძელდება. როგორც კონკურენციის სააგენტოს ხელმძღვანელი ირაკლი ლექვინაძე აცხადებს, რომ სექტემბერში ყველა ტიპის საწვავზე ფასები დაახლოებით 10-30 თეთრით არის დაკლებული. აგვისტოს განმავლობაში კი კლება 30-40 თეთრია.
„საქმე ეხება 2022 წლის შვიდ თვეში დაფიქსირებულ შედეგებს, კერძოდ რუსეთთან იმპორტის შემთხვევაში გაიაფებული საწვავი სათანადოდ არ აისახა საცალო ბაზარზე და ევროპიდან საწვავის იმპორტის შემთხვევაში კონკურენტ მოვაჭრეებზე საბაჟო საწყობიდან ხდებოდა საწვავის უფრო იაფად 1 ლიტრზე 75 თეთრით უფრო გაყიდვა, ვიდრე ეს ხდებოდა საკუთარ ქსელში შეტანისას.
ეს არის მთავარი საკითხები, რის გამოც ჩვენ დაწყებული გვაქვს მოკვლევა და ვცდილობთ, გავარკვიოთ აღნიშნულ საკითხთან დაკავშირებით რეალიზატორების ქცევა რამდენად იყო კეთილსინდისიერი. მოკვლევის პროცესში ჩვენ დავიწყეთ 5 მსხვილი რეალიზატორის მიმართ. მნიშვნელოვანია, რომ ჩვენი მოკვლევის შედეგად გაირკვეს 2022 წლის პერიოდში მაშინ, როდესაც რიგ კომპანიებს შეეძლოთ ხელსაყრელ ფასად მიეწოდებინათ ბაზარზე მომხმარებლისთვის ფასები, ამით გაეზარდათ საკუთარი კონკურენტული უპირატესობა და საბაზრო წილი – რატო არ მოხდა ეს, როდესაც საქართველოში შემოდიოდა გაიაფებული საწვავი და ხომ არ იყო ეს დაკავშირებული რაიმე ტიპის შეთანხმებულ ქცევასთან. საქართველოს პრემიერ-მინისტრის ინიციატივით აღნიშნული მოკვლევა არის დაწყებული და დაახლოებით მოკვლევის დაწყებიდან ექვს თვეში ჩვენ გვექნება კონკრეტული შედეგები, რამდენად კეთილსინდისიერი იყო მსხვილი რეალიზატორების მხრიდან აღნიშნული ქცევა“, – განაცხადა ირაკლი ლექვინაძემ.
როგორც ლექვინაძე განმარტავს, დღეისათვის ნავთობპროდუქტების იმპორტს საქართველოში 45-მდე კომპანია ეწევა, თუმცა სამი მსხვილი კომპანია ფიქსირდება, რომელსაც ჯგუფური დომინირების მოცემულობა აქვს.
რაც შეეხება საცალო ბაზარს აქ 5 მსხვილი რეალიზატორი ოპერირებს, რომლებიც ბაზრის 60%-ს აკონტროლებენ, ხოლო დანარჩენი 40%-ი შედარებით მცირე ქსელებს უჭირავთ.
„ბაზარი 2012 წლის მაჩვენებლებთან შედარებით არის ბევრად უფრო კონკურენტული, თუმცა არის რიგი პროცესები, რაც ამ შემთხვევაში ჩვენს ინტერესს იწვევს და მოკვლევის მთავარი მიზანიც არის, კერძოდ ეს არის 5 მსხვილი რეალიზატორის მხრიდან 2022 წელს დაფიქსირებული ქცევა, როდესაც გაიაფებული იმპორტის შემთხვევაში არ მოხდა სათანადო ასახვა ამ ფასების საცალო ბაზარზე და ამ ქცევის კეთილსინდისიერების შესწავლაზეა ორიენტირებული ჩვენი მოკვლევის პროცესი. მთლიანობაში ეს სურათი გვაქვს, თუმცა რამდენად იყო კონკურენტული მსხვილი რეალიზატორების ქცევა, ამას ბუნებრივია, ჩვენი მოკვლევის პროცესი დაადგენს“, – განაცხადა ლექვინაძემ.