უკრაინა-რუსეთის ომმა ავტომობილების ტრანსპორტირების ვადა გააორმაგა, ჩამოყვანის ღირებულება 50%-ით გაიზარდა, ხოლო კონტეინერების დეფიციტმა დამატებითი პრობლემები შექმნა, — ამის შესახებ ავტო-იმპორტიორთა ასოციაციის ხელმძღვანელმა ლაშა დარბაისელმა „კომერსანტთან“ განაცხადა.

მისი თქმით, ქართველი მომხმარებლების უმრავლესობა აღნიშნული მიზეზების გამო, თავს იკავებს ავტომობილის შეძენისგან. თუმცა დარბაისელის განმარტებით, გაზრდილია მოთხოვნა რეექსპორტზე.

„დღეისათვის მიწოდების ჯაჭვი ძალიან ხანგრძლიავია. გაორმაგებულია ავტომობილის ჩამოსვლის დრო, შესაბამისად მომხმარებელი თავს იკავებს შეძენისგან, რადგან მაგალითად ადგილობრივი მოსახლეობის უმრავლესობა ავტომობილის შეძენას ძველი ავტომობილის გაყიდვით ახდენს, შესაბამისად მისთვის რთულია ავტომობილის გარეშე იყოს 5-6 თვე, რეალურად ხდება ავტომობილების ჩანაცვლება.

ადგილობრივ ბაზარზე მოთხოვნა გვაქვს უფრო მეორად ავტომობილებზე, რადგან მართალია სურვილი დიდია შეიძინონ ჰიბრიდული ავტომობილები რადგან მათი განბაჟება იაფია, მაგრამ სურვილი ერთია და შესაძლებლობა სხვა. შესაბამისად ადგილობრივ ბაზარზე 2009 წლიანი ან 2-3 წლით ახალი და დაბალძრავიანი ავტომობილების შეძენა უფრო ხდება. ავტომობილების ფასი მნიშვნელოვნად არის გაზრდილი, რადგან გაიზარდა მიწოდების დრო, ჩამოყვანის ფასი, ომის გამო შეიქმნა კონტეინერების დეფიციტი და შესაბამისად საჭირო რაოდენობა ვერ შემოდის. ფიზიკურად არ არის კონტეინერები“, — ამბობს ლაშა დარბაისელი.

საქართველოს უმსხვილესი საიმპორტო სასაქონლო ჯგუფი 2022 წლის იანვარ-სექტემბერში წარმოდგენილი იყო მსუბუქი ავტომობილების სახით, რომლის იმპორტმა 1 086.2 მლნ. აშშ დოლარი და მთელ იმპორტის 11.4 პროცენტი შეადგინა, ხოლო ექსპორტმა 590.5 მლნ. აშშ დოლარი (მთლიანი ექსპორტის 14.4 პროცენტი).