სავარაუდოდ კორონავირუსის ახალი შტამი ბრიტანეთში ჯერ კიდევ სექტემბერში გამოჩნდა, თუმცა, აქტიური გავრცელება მხოლოდ ნოემბერს შუა რიცხვებიდან დაიწყო - ნათქვამია ბრიტანეთის საზოგადოებრივი ჯანდაცვის სამსახურის განცხადებაში.

მეცნიერებმა გენეტიკური ჯაჭვების შესწავლის გზით, კორონავირუსის ახალი შტამის წარმომავლობა შეისწავლეს.

„ეს ვირუსი სექტემბერში გაჩნდა, თუმცა, ნოემბრის შუა რიცხვებამდე ამ შტამით დაინფიცირება ძალიან იშვიათი იყო. ახალი ვირუსით დაავადების პირველი შემთხვევები ნოემბრის ბოლოს დადგინდა, როდესაც საზოგადოებრივი ჯანდაცვის სამსახური კენტის საგრაფოში კვლევას ატარებდა - რატომ არ ხდებოდა ამ რეგიონში დაინფიცირების ინტენსიურობა შემოღებული შეზღუდვების მიუხედავად? მოგვიანებით ჩვენ აღმოვაჩინეთ, რომ კორონავირუსის ეს ვარიანტი კენტიდან საგრაფო ესექსში და ლონდონში სწრაფად გავრცელდა“ - ნათქვამია უწყების განცხადებაში.

ახალ ვირუსთან დაკავშირებით ჯერ საკმარისი ინფორმაცია არ არის  - უკვე დადგენილია, რომ ის ძველ ვირუსთან შედარებით უფრო სწრაფად ვრცელდება, თუმცა, არ არსებობს იმის მტკიცებულებები, რომ დაავადება უფრო მძიმედ მიმდინარეობას, ან მეტ სიკვდილიანობას იწვევს - ამბობენ ბრიტანელი მეცნიერები.

 ბრიტანეთის ჯანდაცვის სამინისტროში ახალი ტიპის კორონავირუსის აღმოჩენის თაობაზე 14 დეკემბერს განაცხადეს.

სამეფოს მთავარმა სანიტარულმა ექიმმა განაცხადა, რომ ის SARS-CoV-2-ზე ბევრად უფრო სწრაფად ვრცელდება. ქვეყნის პრემიერ-მინისტრის ბორის ჯონსონის თქმით, კორონავირუსის ახალი გენეტიკური ვარიანტი ძველზე 70%-ით უფრო გადამდებია.

კორონავირუსის ახალი, სავარაუდოდ, უფრო საშიში და აგრესიული შტამის გავრცელების გამო, ბრიტანეთის დიდ ნაწილში სრული ლოკდაუნი გამოცხადდა. ლონდონში და სამხრეთ-აღმოსავლეთ ინგლისის რამდენიმე რეგიონში მოქალაქეებს შობაზე ოჯახებში შეკრება აუკრძალეს.

გარდა ამისა,  ადამიანებს შორის შეხვედრები შეიზღუდა - ყოველ მოქალაქეს მხოლოდ 1 ადამიანთან, ისიც ღია სივრცეში, შეხვედრის უფლება აქვს.

ახალი, სავარაუდოდ, ბევრად უფრო აგრესიული და საშიში ვირუსის აღმოჩენის მიზეზით ლოკდაუნის გამოცხადების შემდეგ, ლონდონი ქაოსმა და პანიკამ მოიცვა - ქალაქის მოსახლეობა შედარებით  უსაფრთხო რეგიონებში გამგზავრებას ცდილობდა.

გზებზე უზარმაზარი საცობები გაჩნდა, სარკინიზგო სადგურები ადამიანებით გაივსო. ბრიტანეთის პრემიერ-მინისტრმა ბორის ჯონსონმა თავისი თანამოქალაქეების საქციელი   „სრულ უპასუხისმგებლობად“ შეაფასა.

მისი თქმით, მთავრობა შობის დღეებში შეზღუდვების შერბილებას აპირებდა, თუმცა, საბოლოოდ ამ გეგმებზე უარი თქვა.

ამ დროისთვის სრული ლოკდაუნის პირობებში 16 მლნ. ბრიტანელი ცხოვრობს.  ჯანდაცვის მინისტრის მეტ ჰენკოკის თქმით, შესაძლებელია ზომები კიდევ უფრო გამკაცრდეს, და ქვეყნის მოსახლეობის მესამედს სახლიდან გასვლაც კი აეკრძალოს.

მაქსიმალური შეზღუდვების ზონებში, მათ შორის ლონდონში დაიხურა თითქმის მთელ მომსახურეობის სფერო, სასურსათო მაღაზიებს და აფთიაქების გარდა.

„ჩვენ გვესმის, რამდენად მძიმეა ეს ყველაფერი ბიზნესისთვის, თუმცა, ჩვენ ამ ზომებს და ადამიანებს ჯანმრთელობისთვის მასობრივ ზიანს შორის არჩევანის გაკეთება გვიწევს“  - განაცხადა მეტ ჰენკოკმა.

ახალმა შტამმა უკვე სხვა ქვეყნებშიც შეაღწია - კერძოდ, დანიაში, ნიდერლანდებში, ავსტრალიაში და სამხრეთ აფრიკაში.

საკუთარი უსაფრთხოების დაცვის მიზნით, ევროკავშირის ქვეყნებში ბრიტანეთთან საზღვრების დახურვას აპირებენ. ამის თაობაზე ცალკეულმა სახელმწიფოებმა უკვე განაცხადეს, თუმცა, გერმანიის კანცლერი ანგელა მერკელი კიდევ უფრო შორს წავიდა - მისი თქმით, ბრიტანეთთან საზღვარი მთლიანად ევროკავშირმა უნდა დაკეტოს.