საქართველოში თეატრები 1 ოქტომბრიდან გაიხსნება. Covid-19-ის გამო დაწესებული რეგულაციების გათვალისწინებით, თეატრები გახსნისთვის სრულ მზადყოფნას გამოთქვამენ.
რეგულაციები ამჟამინდელი სახით, მოითხოვს თეატრებში დეზობარიერს, სადეზინფექციო პროცედურებს, პირბადესა და თითო სკამის გამოტოვებით მაყურებლის განთავსებას — ეს ყველაფერი თეატრში სტუმრების შესაშვებად აუცილებელი წინაპირობაა.
„სამეფო უბნის თეატრის“ ტექნიკური რეჟისორის მაია სახლთხუციშვილის განცხადებით, სივრცე გასახსნელად მზად არის და ყველა რეგულაცია თეატრს გათვალისწინებული აქვს.
„ყველა რეგულაციის გათვალისწინებით, გახსნისთვის უკვე დიდი ხანია მზად ვართ. მაყურებლებს ჩაუტარდებათ თერმოსკრინინგი, დეზინფექცია, პირბადის ტარება აუცილებელი იქნება და დარბაზში ერთი ადგილის გამოტოვებით მოვათავსებთ. ჩვენ ყველა რეგულაციას დავიცავთ და სავარაუდოდ 1 ოქტომბრიდან შევუდგებით საქმიანობას.“ - აღნიშნავს მაია სახლთხუციშვილი.
განსხვავებული მოლოდინი აქვთ „ათონელის თეატრში“, სადაც თეატრის ადმინისტრატორი ნატო მჭედლიშვილი არსებული სიტუაციის გამო ბილეთის ღირებულების სავარაუდო ზრდაზე საუბრობს.
„მზად ვართ გახსნისთვის, თუმცა თუ ერთი სკამის გამოტოვებით მოგვიწევს სტუმრების განთავსება, ასეთ შემთხვევაში, ბილეთის ფასი თავისთავად გაიზრდება. თუმცა, ამ რეგულაციაზე ჯერ დაზუსტებული ინფორმაცია არ გვაქვს და შეიძლება შეიცვალოს.
რაც შეეხება პირბადეებს, ჩვენთან ერთმოქმედებიანი სპექტაკლებია და მაქსიმუმ 1 საათი და 10 წუთი გრძელდება, გვაქვს ვენტილაცია და სპექტაკლის დროს ჩახუთულობა არ იქნება, - აცხადებს ნატო მჭედლიშვილი.
როგორც „კომერსანტს“ ახმეტელის თეატრის სამხატვრო ხელმძღვანელმა ირაკლი გოგიამ განუცხადა, სახელმწიფო თეატრებმა ბილეთის ფასი არ უნდა გაზარდონ.
„ვფიქრობთ ძალიან ბევრი მაყურებელი გვეყოლება, რადგან სოციალურ ქსელში დაინტერესებულ პირებს აქტიურად ვეკონტაქტებით. ბევრი იწერება სპექტაკლების შესახებ და ერთი კვირის თავზე მათ ოქტომბერ-ნოემბრის რეპერტუარს მივაწოდებთ.
რაც შეეხება რეგულაციებს, ეს მსოფლიოს მასშტაბით ასე ხდება. ჩემი კოლეგები სხვადასხვა ქვეყნებში უკვე მონაწილეობენ წარმოდგენებში შესაბამისად, არც ჩვენ შეგვაფერხებს ეს სიტუაცია სპექტაკლების ჩასატარებლად.
ერთი სკამის გამოტოვების შემთხვევაში მაყურებლის განთავსების გამო, ბილეთის ფასი არ უნდა გაიზარდოს, რადგან ამ რეგულაციებს მუდმივი სახე არ აქვს. ეს არის გარკვეული პერიოდი და რადგან ჩვენ ქართველ მაყურებელს ვემსახურებით, ბილეთის ფასი მათი ბიუჯეტიდან გამომდინარე უნდა იყოს და არა კორონა-რეგულაციიდან.
მაყურებელი მონატრებულია თეატრს და ჯობია იგივე ფასში მივაწოდოთ პროდუქტი, განსაკუთრებით სახელმწიფო თეატრებმა, რომლებსაც სახელმწიფო აფინანსებს. კერძო თეატრებმა უნდა გაზარდონ ფასი, რადგან ისინი მხოლოდ თავის შემოსავალზე არიან დამოკიდებულნი. რა თქმა უნდა, ჩვენც ვართ შემოსავალზე დამოკიდებული, მაგრამ საბაზისო ბიუჯეტს (ხელფასს, კომუნალურ ხარჯებს და. ა.შ) სახელმწიფო უზრუნველყოფს. შესაბამისად, ჩვენი თეატრი ბილეთის ფასს არ გაზრდის.“ - განმარტავს ირაკლი გოგია.
შეგახსენებთ, რომ საქართველოში თეატრები გარკვეული შეზღუდვებით 1 ოქტომბრიდან გაიხსნება. როგორც ჯანდაცვის სამინისტროს შრომის პირობების ინსპექტირების დეპარტამენტის უფროსმა ბექა ფერაძემ განაცხადა შენობაში პირბადის ტარება სავალდებულო იქნება, დაწესდა სპექტაკლის ხანგრძლივობის 3 საათიანი ზედა ზღვარი, ხოლო მაყურებლები დარბაზში თითო სკამის გამოტოვებით დასხდებიან.
სავალდებულო იქნება სკრინინგის განხორციელება და სადეზინფექციო სამუშაოების ჩატარება. 5 კვადრატულ მეტრზე მოხდება 1 ადამიანის დაშვება და განისაზღვრება ღონისძიების ზედა ზღვარი, ეს არის 3 საათი, რომელიც მოიცავს მომხმარებლის როგორც შენობაში შესვლის, ასევე დატოვების პროცესს. ღონისძიება უნდა გაიმართოს უწყვეტად, ანტრაქტის გარეშე.
ანი ცარციძე