ტურისტული სეზონის პიკზე აფხაზეთის პლაჟები მთლიანად თუ არა, დიდწილად მაინც დაცარიელდა.
საქართველოს ამ ოკუპირებული რეგიონის ტურისტული ინდუსტრია ნაკადის ზრდას თურქეთის „დახურვის“ და კრასნოდარის მხარეში რეგულაციების გამკაცრების გამო ვარაუდობდა, თუმცა, მოლოდინები არ გამართლდა - კორონავირუსით ინფიცირების კუთხით აფხაზეთი პოსტ-საბჭოთა სივრცეში ლიდერი გახდა.
სადღეისოდ აფხაზეთში დაავადებულთა ჯამურმა რაოდენობამ 19 000-ს, ხოლო გარდაცვლილთა რაოდენობამ – 270-ს მიაღწია - ეს ძალიან დიდი ციფრებია აფხაზეთისთვის, რომლიც მოსახლეობაც 180 000-ს არ აღემატება.
ამჟამად კოვიდ-დაავადებულებს 5 კლინიკაში მკურნალობენ, ყველაზე დიდი დატვირთვა კი გუდაუთის კოვიდ-ჰოსპიტალზე მოდის. სწორედ იქ არის აფხაზეთში ერთადერთი კომპიუტერული ტომოგრაფიის აპარატი, რომელსაც კორონავირუსის დროს სასიცოცხლო მნიშვნელობა აქვს. ეს აპარატი ხან მუშაობს, ხან არა - მაგალითად, დღეს ის მწყობრიდანაა გამოსული - ელექტროქსელებში ძაბვის ვარდნის გამო. მის აღდგენაზე ბელარუსი სპეციალისტები მუშაობენ.
აფხაზი ექიმების თქმით, ინფიცირების ზრდას ხელს ადგილობრივი მოსახლეობის წარმოუდგენელი უპასუხისმგებლობა უწყობს - აფხაზები პირბადეებს არ ატარებენ, დისტანციას არ იცავენ, ქორწილები და სხვა ხალხმრავალი ღონისძიებები ჩვეულებრივად ტარდება.
რაც შეეხება ვაქცინაციას, დიდი პროგრესი არც ამ მიმართულებითაა - აპრილში რუსეთმა აფხაზეთს 6500 დოზა ვაქცინა მიაწოდა, რომელიც უკვე დიდი ხნის წინ ამოიწურა, ახალი პარტია კი, უკეთეს შემთხვევაში, აგვისტოში იქნება.
ადრე აცრაზე დიდი მოთხოვნა არ იყო, მაგრამ დაავადებულთა და გარდაცვლილთა რაოდენობის ზრდის პირობებში ვაქცინაციის მსურველთა რაოდენობა მკვეთრად გაიზარდა. ეს ერთგვარი აფხაზური პარადოქსია - ადამიანები დაავადებას სერიოზულად აღიქვავან და ვაქცინაციას ელოდებიან, მაგრამ ამავე დროს უსაფრთხოების არანაირ ზომებს არ იცავენ.
სწორედ ესაა იმის მიზეზი, რომ აფხაზეთის პლიაჟები და ბუნების სილამაზე რუს ტურისტებს ამ ეტაპზე არ იზიდავენ.
საბოლოო ჯამში, აქტიური ტურისტული სეზონი ადგილობრივებისთვის შორეულ ოცნებად რჩება. თუმცა, ტურიზმის ე.წ. სამინისტროს პროგნოზით, წელს აფხაზეთი ჩასულ ტურისტთა რაოდენობა 500 000-ს მაინა მიაღწევს. ეს 2-ჯერ ნაკლებია წინა პროგნოზთან შედარებით.
კიდევ ერთი ფაქტორი, რომელიც აფხაზეთში ტურისტების რაოდენობის ზრდას აფერხებს - კრიმინოგენური მდგომარეობაა, რომელიც ტურისტული სეზონის პერიოდში, როგორც წესი, მწვავდება. სეზონი ჯერ ახალი დაწყებული იყო, როდესაც ადგილობრივმა მაცხოვრებელმა ორი რუსი ტურისტი პირდაპირ სასტუმროს რესტორანში ჩაცხრილა.
მართალია, აფხაზეთის ე.წ. უშიშროების საბჭოს თავჯდომარე სერგეი შამბა მიიჩნევს, რომ კრიმინოგენური ვითარება წინა წლებთან შედარებით მნიშვნელოვნად გაუმჯობესდა, ეს რუსი პოტენციური ტურისტებისთვის მაინცა და მაინც სარწმუნოთ არ ჟღერს.
აფხაზეთის ე.წ. პრეზიდენტმა ასლან ბჟანიამ კი განაცხადა, რომ ამ ინციდენტის შემდეგ სამართალდამცავი სისტემის რეფორმირების ახალ გეგმაზე დაიწყო მუშაობა, თუმცა, ასეთი გეგმები აქამდეც მრავლად იყო და ყველა უშედეგო.
ასე რომ, კრიმინალს, ცუდ მომსახურეობას, ფასების გაბერვას და სხვა არასასიამოვნო ფაქტორებს მძიმე ეპიდემიოლოგიური ვითარებაც დაემატა.
ამჯერად აფხაზებს ზამთრის სეზონის იმედი აქვთ, როდესაც, როგორც ისინი ამბობენ, „კორონა წავა - ტურისტი მოვა“. თუმცა, სავარაუდოდ, არ მოვა, ყოველ შემთხვევაში, ფინანსურად მნიშვნელოვანი რაოდენობით.
rosbalt.ru