კაცობრიობას მალე კორონავირუსის მეხუთე ტალღა ელის. როგორ შეთავსდება ის გრიპის ახალ შემოტევასთან, რომელიც ევროპაში და ამერიკაში შეზღუდვების შერბილების ფონზე აუცილებლად იქნება?

გასულ წელს გრიპით დაინფიცირება მთელს მსოფლიოში მკვეთად შემცირდა და თითქმის ნულამდე დაეცა - ლოკდაუნი, დისტანცირება, პირბადეების ტარება - ამ ზომებმა კორონავირუსთან ერთად გრიპის გავრცელებაც შეამცირეს.

სამწუხაროდ, ეს ნიშნავს, რომ ამ წელს გრიპი განსაკუთრებით მძიმე იქნება. გარკვეულწილად ორგანიზმის იმუნური პასუხი კორონავირუსზე და გრიპზე თითქმის იდენტურია - დაავადების გადატანა ან ვაქცინაცია ორგანიზმს შემდგომი დაინფიცირებისგან კარგად იცავს, თუმცა, იმუნიტეტი ხანმოკლეა.

რაც მეტი დრო გადის იმუნიტეტის მიღებასa და განმეორებით დაინფიცირებას შორის, მით უფრო მძიმე შეიძლება იყოს დაავადების მიმდინარეობა.

ეს ცხადი ხდება, თუ შევხედავთ, როგორ ურტყამს გრიპი ადამიანებს, რომლებიც იზოლირებულ ადგილებში, მაგალითად, შორეულ კუნძულებზე ცხოვრობენ. ისინი დიდ ხნის მანძილზე გრიპით არ ავადდებიან, თუმცა, დაინფიცირების შემთხვევაში დაავადება უფრო მძიმედ გადააქვთ, სიკვდილიანობა კი მათ შორის საშუალოზე მაღალია.

2020 წლის დასაწყისიდან ლოკდაუნების და შეზღუდვების გამო, ჩვენ ყველა ფაქტობრივად შორეული კუნძულებზე ვცხოვრობდით, ამიტომაც, სავარაუდოდ, მოსახლეობის ბუნებრივი იმუნიტეტი გრიპის წინააღმდეგ მნიშვნელოვნად დაეცა.

ეს კი ნიშნავს, რომ დაბრუნებული გრიპი გაცილებით მეტ ადამიანს დააზიანებს და ჩვეულებრივზე მეტ მძიმე შედეგებს გამოიწვევს. იგივე სხვა რესპირატორულ ვირუსებსაც ეხება.

ფაქტობრივად, დღეს უკვე ასეც არის - ბოლო პერიოდში ბრიტანეთში ვრცელდება ინფორმაცია რესპირატორულიო დაავადებების განსაკუთრებით მძიმე მიმდინარეობის თაობაზე. საბედნიეროდ არსებობს გრიპის საწინააღმდეგო საკმაოდ კარგი ვაქცინები, თუმცა, მათი ეფექტურობა არამდგრადია - ვირუსის შტამები უფრო სწრაფად მუტირებენ, ვიდრე ვაქცინები იცვლება.

კორონავირუსის პანდემიამდეც ზამთრის გრიპი ევროპაში ჯანდაცვის სისტემაზე ძლიერ ზეწოლას ახდენდა, დღეს კი, როდესაც კლინიკების დიდი ნაწილი კოვიდთან ბრძოლაშია ჩართული, მდგომარეობა უფრო რთული იქნება.

გარდა ამისა, არსებობს ორმაგი დაინფიცირების რისკიც - კორონავირუსით დაავადება სხვა ინფექციების ორგანიზმში შეღწევას არ გამორიცხავს. ლონდონის ერთ-ერთ კლინიკაში ჩატარებულმა კვლევამ აჩვენა, რომ კოვიდით დაავადებულთა 19% სხვა ინფექციებსაც ატარებდა.

 ასევე დადასტურდა, რომ ორმაგი ვირუსის მატარებლებს შორის სიკვდილიანობა უფრო მაღალი იყო, ვიდრე მხოლოდ კორონავირუსით დაავადებულებს შორის. ბრიტანელი ექიმების დასკვნის თანახმად, ორმაგი ინფექციით დაავადებულები ორჯერ ხშირად ხვდებოდნენ რეანიმაციაში, საჭიროებდნენ ფილტვების ხელოვნურ ვენტილაციას და უფრო მეტი იღუპებოდა, ვიდრე მხოლოდ კოვიდით ინფიცირებულები.

იმის გამო, რომ გრიპი დღეს უკვე დიდი საფრთხეს წარმოადგენს და დიდი წნეხის გამო, რომელსაც ის ჯანდაცვის სისტემაზე მოახდენს, კოვიდთან ბრძოლა კიდევ უფრო გართულდება. ამიტომაც, ორმაგად მნიშვნელოვანია, რომ საზოგადოება საჭიროების შემთხვევაში ორმაგ ვაქცინაციას - გრიპზე და კორონავირუსზე დათანხმდეს.

slate.fr