COVID-19-ის მიმართ „ნულოვანი ტოლერანტობის“ პოლიტიკის მიმართ საზოგადოების მწვავე უკმაყოფილების ფონზე, ჩინეთის ხელისუფლებამ პოლიტიკის შერბილება გადაწყვიტა.

იმისდა მიუხედავად, რომ ჩინეთში მსოფლიოში ერთ-ერთი ყველაზე მკაცრი ანტიპანდემიური კონტროლია, ქვეყანაში დაავადებულთა რიცხვი იზრდება. ნოემბრის დასაწყისიდან, ქვეყნის ბევრ ქალაქში კარანტინია და მოსახლეობას რეგულარული PCR ტესტების გაკეთება მოეთხოვებათ.  ამ ფონზე, ნოემბრის ბოლოს ჩინეთის უმსხვილეს ქალაქებში - შანხაიში, პეკინში, გუანჯოუში, ვუჰანში - საპროტესტო გამოსვლები გაიმართა.

ჩინეთის სახალხო რესპუბლიკის სახელმწიფო საბჭოს კორონავირუსის პრევენციისა და კონტროლის ხელმძღვანელობამ გამოაქვეყნა განცხადება, სადაც ანტიეპიდემიური პოლიტიკის ოპტიმიზაციაზეა საუბარი.

განცხადებაში ნათქვამია, რომ აღარ მოხდება კარანტინის თვითნებური გაფართოება მთელ საცხოვრებელ კომპლექსებზე, ქუჩებზე, უბნებსა და დასახლებებზე. ადრე, მრავალმილიონიანი უბანი შესაძლოა ინფექციის რამდენიმე ათეული შემთხვევის გამო ჩაკეტილიყო.

PCR ტესტირებას მხოლოდ ისინი გაიკეთებენ, ვინც მუშაობს ან დროებით იმყოფება მაღალი რისკის ზონაში.  ჩინეთის ერთი რეგიონიდან მეორეში მოგზაურობისას PCR ტესტები და ე.წ. ელექტრონული „ჯანმრთელობის კოდები“ საჭირო აღარ იქნება.

კიდევ ერთი მნიშვნელოვანი სიახლე ისაა, რომ უსიმპტომო პაციენტები და ისინი, ვისაც ვირუსი მსუბუქ ფორმაში აქვთ, საკუთარ სახლებში შეძლებენ დარჩენას და აღარ მოუწევთ ცენტრალიზებულ კარანტინში მკურნალობა;

კარანტინი და დახურვა აღარ შეეხება აფთიაქებს და აუცილებელი ჯანდაცვის სერვისებს, მაღალი რისკის ზონების გარეთ არ შეიზღუდოს ადამიანების გადაადგილება და არ შეფერხდეს მუშაობა და წარმოება.

სამედიცინო პერსონალმა, საზოგადოებრივ უსაფრთხოებაში, ტრანსპორტსა და ლოჯისტიკაში, სავაჭრო და კვების საწარმოებში, ენერგეტიკაში, ელექტროენერგიასა და წყალმომარაგებაში დასაქმებულმა პერსონალმა მკაცრად უნდა შეასრულონ თავისი სამუშაო დამცავ აღჭურვილობაში და აუცილებლად ვაქცინირებული უნდა იყოს.

იკრძალება შენობებში სახანძრო გასასვლელების და ბინის კარების გადაკეტვა, რათა სასწრაფო დახმარებისა და ექიმებისთვის შენობებში შეუფერხებელი შესვლა იყოს უზრუნველყოფილი. ეს უკანასკნელი, სავარაუდოდ, საცხოვრებელ კორპუსში გაჩენილ ხანძართანაა დაკავშირებული, რომლის დროსაც ქალაქ ურუმჩიში 10 ადამიანი დაიღუპა. სწორედ აქედან აგორდა დიდი საპროტესტო ტალღა ჩინეთში, რომელიც ფიზიკურ დაპირისპირებაში გადაიზარდა.

განცხადებაში ასევე ნათქვამია, რომ სკოლებმა, სადაც ინფექციის შემთხვევები არ გამოვლენილა, ჩვეულ რეჟიმში უნდა იმუშაონ. იგივე წესი ეხება მაღაზიებს, სასადილოებს, სტადიონებსა და ბიბლიოთეკებს.

მოამზადა მაკა ბიბილაშვილმა