რუსეთის ფედერაციის პრეზიდენტის პრესსპიკერის დიმიტრი პესკოვის განცხადებით, „ჩრდილოეთის ნაკადი“ მუშაობას მაშინ განაახლებს, როცა დასავლეთის ქვეყნები რუსეთს სანქციებს მოუხსნიან.

„სანქციების მოხსნის შემდეგ, საშუალება გვექნება „ჩრდილოეთის ნაკადის“ ტურბინებს სარემონტო სამუშაოები ჩავუტაროთ, რადგან სწორედ ამ მიზეზით გაჩერდა გაზსადენი“, - აღნიშნა პესკოვმა.

„რა თქმა უნდა, სწორედ დასავლეთის ქვეყნების მიერ დაწესებული სანქციები უშლის აგრეგატის მომსახურებას, მის გადაადგილებას იურიდიული გარანტიების გარეშე. სწორედ ამ სახელმწიფოებმა მიიყვანეს ვითარება ამ დონემდე“, - განაცხადა პესკოვმა.

მისი თქმით, გაზის გადატუმბვის პრობლემა, სწორედ სანქციების გამო შეიქმნა. „სხვა მიზეზები არ არსებობს. მუშაობს მხოლოდ ერთი აგრეგატი და მასაც ხარვეზები აქვს. ეს აფერხებს ამოტუმბვის პროცესს“, - აღნიშნა პესკოვმა.

რუსეთის სახელმწიფო კომპანია „გაზპრომმა“ 2 სექტემბერს, ტექნიკური მიზეზების გამო, ევროპას ბუნებრივი აირის მიწოდება შეუწყვიტა.

რუსული მხარე აცხადებს, რომ ზეთის გაჟონვამ, ხელი შეუშალა გაზის ტურბინის ძრავის ამოქმედებას. ტურბინების მწარმოებელი Siemens ამტკიცებს, რომ გაჟონვის გამოსასწორებლად ძრავის გაჩერება საჭირო არ არის.

ევროკავშირის ქვეყნები, რომლებიც ელოდნენ მიწოდების პრობლემებს, ბოლო თვეებში გაზსაცავები შეავსეს.

ევროკავშირის ენერგეტიკის მინისტრები მომავალ პარასკევს შეხვედრას გეგმავენ. ევროკავშირი ეძებს გზებს, რათა დაამშვიდოს არასტაბილური ბაზარი და დაიცვას ხალხი მაღალი ფასებისგან.

europetime.eu