კრიპტობაზარზე დიდი ვარდნა გრძელდება. პირველ ათეულში შემავალმა ზოგიერთმა კოინმა ბოლო 24 სთ-ში ღირებულების 30%-ზე მეტი, ბოლო ერთ კვირაში კი 50%-ზე მეტი დაკარგა. ჯამური კრიპტოკაპიტალიზაცია $1.130 ტრლნ-ს შეადგენს, მაშინ როცა სულ რამდენიმე თვის წინ მხოლოდ ბიტკოინის კაპიტალიზაცია $1.270 ტრლნ-ს აჭარბებდა.

ბიტკოინის ღირებულება 2020 წლის დეკემბრის შემდეგ პირველად $27 000-ს ჩამოსცდა. ის ბოლო ერთ კვირაში 30%-ით გაუფასურდა. ბოლო ერთ კვირაში ეთერიუმმა 36% დაკარგა და ახლა მისი ფასი $1800-ზე ნაკლებია. ერთკვირიან ჭრილში კიდევ უფრო მძიმე დღეში რიპლი აღმოჩნდა მისი ფასი 42%-ით 37 ცენტამდე დავარდა.

ბოლო პერიოდში ერთ-ერთ პერსპექტიულ ვალუტად კარდანო მიიჩნეოდა, მაგრამ მისი ფასი შვიდ დღეში განახევრდა და 45 ცენტამდე შემცირდა. 44%-იანი ვარდნის შემდეგ დოჯკოინის ფასი 7.5 ცენტს გაუტოლდა. 1 წლის წინ, პიკზე დოჯი თითქმის 10-ჯერ მეტი - 73 ცენტი ღირდა.

ტრეიდერთა ნაწილი კრიპტოვალუტებს პანიკურად იშორებს, ნაწილისთვის კი ინვესტირების საუკეთესო საშუალებაა. პროგნოზი კრიპტოსამყაროში უფრო რთულია ვიდრე ტრადიციულ ბირჟაზე. კრიპტოვალუტამ ჯერჯერობით ჩვეულებრივი ფული ვერ ჩაანაცვლა, თუმცა არც არსებობა შეუწყვეტია.