2021 წლის იანვრის შემდეგ პირველად ჯამური კრიპტოკაპიტალიზაცია $1 ტრლნ-იან ნიშნულს ჩამოსცდა, რაც ნოემბრის პიკთან შედარებით თითქმის 3-ჯერ ნაკლებია. ბიტკოინმა 8 თვეში ღირებულების 65% დაკარგა. ათეულში შემავალმა ზოგიერთმა ვალუტამ კი 90%-ზე მეტი.

გასული წლის 10 ნოემბერს ბიტკოინის ფასმა ისტორიულ მაქსიმუმს $68 700-ს მიაღწია, დღეს $24 700 ღირს. წლის დასაწყისში ბიტკოინი $47 000 ღირდა, მარტის ბოლოს $49 000. დიდი ვარდნა მაისში დაიწყო რა დროსაც 1 კვირაში ფასი $12 000-ით $40 000-დან $28 000-მდე შემცირდა.

თუ ბიტკოინის ღირებულება ბოლო 24 საათში 10%-ით და ბოლო 1 კვირაში 21%-ით შემცირდა, #2 კრიპტოვალუტა ეთერიუმმა ერთ დღეში ღირებულების 13%, ბოლო ერთ კვირაში კი 33% დაკარგა. ეთერიუმი ახლა 18 თვიან მინიმუმზეა და $1250 ღირს - 75%-ით ნაკლები ვიდრე 2021 წლის ნოემბერში.

32 ცენტიანი ღირებულებით 2021 წლის იანვრის ფასს დაუბრუნდა რიპლიც. რიპლი ყველაზე ძვირი - 3.84 აშშ დოლარი 2018 წლის იანვარში ღირდა ამჟამინდელი ფასი 92%-ით ნაკლებია.

კიდევ ერთი პოპულარული კრიპტოვალუტის დოჯკოინის ფასი 5.6 ცენტამდეა შემცირებული. 2021 წლის მაისში მისმა ფასმა 73 ცენტს მიაღწია, რიპლის მსგავსად, მანაც მაქსიმალური ღირებულების 92% დაკარგა, ოღონდ უფრო მცირე დროში.

სატოში ნაკამოტოს სახელით ანონიმურმა პირმა ბიტკოინი როგორც ციფრული ვალუტა 2008 წლის მიწურულს წარადგინა. მისი ღირებულება 1 ცენტზე ნაკლები იყო და მაინინგისთვის ჩვეულებრივი ლეპტოპიც გამოდგებოდა.

ბიტკოინის ღირებულება სწრაფად იზრდებოდა, მაგრამ ფართო საზოგადოების ყურადღება პირველად მაინც 2017 წელს მიიპყრო, როდესაც მისმა ფასმა $20 000-ს მიაღწია. იმავე პერიოდში მკვეთრად გაიზარდა სხვა კრიპტოვალუტების ღირებულებაც, რის გამოც საქმეში ცენტრალური ბანკები და სხვა მარეგულირებლები ჩაერთვნენ. აკრძალვებმა და რეგულაციებმა ფასების ვარდნა გამოიწვია. 4 წლის შემდეგ მორიგი პიკის დროს ახალი რეკორდები მოიხსნა.

რეგულაციების გარდა კრიპტობირჟაზე გავლენას სხვა ფაქტორებიც ახდენს. შეერთებულ შტატებში ინფლაცია 40 წლიან მაქსიმუმზეა, იზრდება საპროცენტო განაკვეთებიც, რის გამოც ინვესტორებმა სარისკო აქტივებში თანხების დაბანდება შეამცირეს. ვარდნაში გარკვეული როლი პანიკურმა გაყიდვებმაც შეასრულა, როცა რაიმეს მიწოდება იზრდება იქნება ეს ხორბალი, ნავთობი თუ ბიტკოინი სხვა თანაბარ პირობებში ფასი კლებულობს.

კრიპტოსამყაროში პროგნოზი ძალიან არასაიმედოა. ზუსტად იმის განსაზღვრა სადამდე გაგრძელდება ვარდნა და როდის დაბრუნდებიან ბაზარზე ხარები პრაქტიკულად შეუძლებელია. იმ დროს როდესაც ინვესტორთა ნაწილი ციფრულ ფულს პანიკურად იშორებს, მეორე ნაწილისთვის ეს შესასყიდად საუკეთესო დროა. ასეთი დაბალი ფასები შეიძლება აღარასდროს განმეორდეს.