საქართველოში სათამაშო ბიზნესის ბრუნვა წლიდან წლამდე იზრდება. პროცესი ვერც პანდემიამ შეაფერხა. მიუხედავად იმისა, რომ თითქმის 10 თვე ყველა ტოტალიზატორი და კაზინო დაკეტილი იყო, ონლაინთამაშების ხარჯზე, სექტორის ჯამური ბრუნვა (დადებული ფსონების ჯამი) 22%-ით, 31.7 მლრდ ლარამდე გაიზარდა. ეკონომიკური კრიზისის მიუხედავად, მნიშვნელოვნად, 88%-ით გაიზარდა აზარტული თამაშების ბაზარის ერთ-ერთი ლიდერი კომპანიის, „კრისტალბეთის“ წმინდა მოგება, თანხამ 177 მლნ ლარი შეადგინა. ეს მაშინ, როდესაც ქვეყნის ყვეალაზე მძლავრი ფინანსური ინსტიტუების წმინდა მოგება შემდეგი იყო:
1) „თიბისი ბანკი“ – 123,180,649 ლარის წმინდა მოგება.
2) „საქართველოს ბანკი“ – 57,108,880 ლარის წმინდა მოგება.
3) „კრედო ბანკი“ – 13,950,614 ლარის წმინდა მოგება.
4) „ბაზისბანკი“ – 5,972,349 ლარის წმინდა მოგება.
5) „პროკრედიტ ბანკი“ – 3,534,386 ლარის წმინდა მოგება.
2020 წლის კონსოლიდირებულ აუდიტორულ ანგარიშში ვკითხულობთ, რომ „კრისტალბეთის“ წმინდა შემოსავალი სათამაშო საქმიანობიდან 363 მლნ ლარი იყო:
- შემოსავალი ონლაინ კაზინოს თამაშებიდან - 270 მლნ ლარი.
- შემოსავალი ონლაინ ტოტალიზატორიდან - 70 მლნ ლარი.
- შემოსავალი ონლაინ peer-to-peer თამაშებიდან - 11 მლნ ლარი.
- სხვა შემოსავალი მომხმარებლებთან გაფორმებული ხელშეკრულებებიდან - 11.12 მლნ ლარი.
კომპანიის საოპერაციო ხარჯები 158 მლნ ლარი იყო, საიდანაც ყველაზე მეტი – 52 მლნ ლარი თამაშების მომწოდებლის ხარჯებია, 38 მლნ ლარი გადასახადი ტოტალიზატორის ფსონებზე, 35 მლნ ლარი მომსახურების მომწოდებლის მოსაკრებლები და ბანკის საკომისიოები, 26 მლნ ლარი კი მარკეტინგის და სარეკლამო ხარჯები.
დოკუმენტში ვკითხულობთ, რომ COVID 19-ს კომპანიის ოპერაციებზე დაუყოვნებელი უარყოფითი გავლენა ჰქონდა, რამაც კომპანიის მიერ ყველა კაზინოს საქმიანობის შეწყვეტა გამოიწვია, ასევე ძირითადი სპორტული ღონისძიებების გაუქმება, რამაც 2020 წლის მარტიდან ივნისამდე პერიოდში, სპორტულ საქმიანობასთან დაკავშირებული შემოსავლის შემცირება გამოიწვია. თუმცა, რადგან კომპანიის ძირითადი საქმიანობა ონლაინ თამაშებს უკავშირდება, რომლებზეც არსებითი გავლენა არ ჰქონია COVID-19-ის აფეთქებას, საერთო ჯამში პანდემიამ კომპანიის ფინანსურ მდგომარეობაზე არსებითი უარყოფითი გავლენა არ იქონია.
„კრისტალბეთი“ (შპს „მარსი“) 2005 წლის 5 მაისს დაარსდა. კომპანიის საკონტროლო პაკეტის (51%) მფლობელია „Bwin Holdings (Malta) Limited“, რომლის საბოლოო მაკონტროლებელ მხარესაც წარმოადგენს „Entain PLC“ (ყოფილი: GVC Holdings PLC) - მსოფლიოში ერთ-ერთი უმსხვილესი აზარტული თამაშების ბაზარსა და სამომხმარებლო სექტორზე მოოპერირე „ჯგუფი“. კომპანიის წილის დანარჩენ 49%-ს ფლობენ საქართველოს მოქალაქე ფიზიკური პირები: ლევან ახვლედიანი 24%, კნიაზ დასენი 10%, გიორგი ჩხეიძე 5%, კობა გიგლემიანი 5%, ვანო გიგლემიანი 5%.
ბაჩო ადამია