კორონავირუსის პანდემიამ მთელი მსოფლიო განსხვავებული რეალობის წინაშე დააყენა. ვირუსის პრევენციის მიზნით დაწესებულმა რეგულაციებმა სრულად შეცვალა საზოგადოების ქცევა და ადამიანებში ღირებულებები გადააფასა. ამასთან, ძირეულად გარდაიქმნა ბიზნესის როლი და გლობალური ეკონომიკა.

არსებული უსაფრთხოების რეგულაციების გამო საქართველოში, ისევე როგორც მსოფლიოს ბევრ ქვეყანაში, სტუმარმასპინძლობის სფერო ფაქტობრივად გაჩერდა. თუმცა, KTW ჯგუფმა ახალ გამოწვევებთან ღირსეულად შეხვედრის მყარი გადაწყვეტილება მიიღო.

პანდემიის თანმხლებ გამოწვევებთან ერთად, ჩვენ ამ საფრთხეებსა და წინააღმდეგობებში შესაძლებლობები დავინახეთ. მოვბილიზდით და ბევრი ვიმუშავეთ, რათა მაქსიმალურად მოვრგებოდით შექმნილ რეალობას. თამამად შემიძლია ვთქვა, რომ ჩვენ ეს შევძელით!

პანდემიის დაწყებიდან დღემდე კომპანიის პროდუქციის ექსპორტი არ შეჩერებულა. ჩვენ არათუ 100%-ით შევინარჩუნეთ თანამშრომლები, აქცენტი სოფლის მეურნეობაზე გავაკეთეთ და ამ სფეროში დასაქმებულთა რიცხვი საგრძნობლდ გავზარდეთ. დისტანციური სერვისების გაფართოვებით და KTW ჯგუფის თანამშრომელთა თავდაუზოგავი შრომის შედეგად, ბევრი სიახლე შევძინეთ ჩვენს საქმიანობას.

უნდა აღინიშნოს, რომ ამ რთულ პერიოდში ქართული ბიზნესისა და დასაქმებული ადამიანების დასახმარებლად სახელმწიფომ დიდი შრომა გასწია, რათა მაქსიმალურად უმტკივნეულოდ ჩაევლო ახალი რეგულაციების დაწესებას. ასევე, უმნიშვნელოვანესია საქართველოს მთავრობის წვლილი ჯანმრთელობის დაცვის მიმართულებით. პანდემიის გამოცხადებიდან დღემდე მნიშვნელოვან შემოტევებს გავუმკლავდით მათი გონივრული ტაქტიკის წყალობით. ეს ყველაფერი ცხადყოფს, თუ რამდენად მდგრადია ქვეყანა ასეთ მძიმე პერიოდშიც კი. მადლიერებას გამოვხატავთ ამ თანადგომისა და მხარდაჭერისთვის.

თავისმხრივ, ვირუსის საწინააღმდეგო ვაქცინის იმედისმომცემმა შედეგებმა, მსოფლიო მოსახლეობას და მათ შორის ჩვენც, ძველი შემართება ნაწილობრივ დაგვიბრუნა.

ჩვენ, KTW ჯგუფი მზად ვართ დამატებით კიდევ 100 მლნ ლარის ინვესტიცია განვახორციელოთ საქართველოში. შევქმნათ და განვავითაროთ ახალი მიმართულებები, როგორც სტუმარმასპინძლობის სფეროში, ასევე აგრო ბიზნესსა დეველოპმენტში.

მანამდე კი, ქართული ეკონომიკა დიდი გამოწვევების წინაშე რჩება, რომელსაც შესაბამისად უნდა ვუპასუხოთ.

ვფირობ, მომავალ 2021-2023 წლებზე პოზიტიური პროგნოზის გაკეთება შეიძლება. უახლოეს მომავალში ქვეყანაში აღარ დადგება კარანტინის დაწესების აუცილებლობა და ინვესტირებასაც აღარ შევუშინდებით. უკვე გამოცდილ და არსებულ გარემოსთან ადაპტირებულ ქვეყანაში კი ტურიზმი კიდევ უფრო მეტად განვითარდება. ცხადია, ამ ყველაფერს რეგიონში სტაბილურობა და სიმშვიდეც სჭირდება. ეს არის გრძელი გზა, რომელსაც უკეთესი მომავლისკენ მივყავართ. ამ გზაზე კი დიდი მოთმინება, თავდაუზოგავი შრომა და რეკომენდაციების მკაცრად დაცვა გვმართებს.

(R)