საქართველოში ღვინის და სპირტიანი სასმელების ერთ-ერთმა უმსხვილესმა მწარმოებელმა „კახურმა ტრადიციულმა მეღვინეობამ“ პანდემიური წელი ₾15 მლნ-იანი ზარალით დაასრულა. ეს პირველი შემთხვევაა ბოლო 4 წლის განმავლობაში, როდესაც ზურაბ ჩხაიძის კომპანია ზარალზე გავიდა.
კომპანიის წლიურ ანგარიშში ვკითხულობთ, რომ KTW ჯგუფის გაყიდვები ძირითადად საექსპორტო ბაზრებზე მოდიოდა. კომპანიის მთავარი საექსპორტო ბაზარი რუსეთია, სადაც „კახურმა ტრადიციულმა მეღვინეობამ“ ₾ 65 მლნ. ღირებულების პროდუქცია გაყიდა. მას მოსდევს უკრაინა ₾ 32 მლნ. შემდეგ ბელარუსი ₾ 1.7 მლნ. მოლდოვა ₾ 1.4 და ჩინეთი ₾ 0.5 მლნ. ჯამში ამონაგებმა ექსპორტიდან ₾ 103 მლნ. შეადგინა, ხოლო ადგილობრივ ბაზარზე კომპანიამ ₾ 2 მლნ-ს ალკოჰოლური სასმელების რეალიზაცია შეძლო. 2019 წელთან შედარებით 2020 წლის რეალიზაცია რუსეთის ბაზარზე გაიზარდა 27%-ით, ბელარუსის 100%-ით, ლატვია-ესტონეთი შემცირდა 2-ჯერ, აშშ გაიზარდა 3,33-ჯერ, ჩინეთი შემცირდა 73%-ით და სხვა. საერთო ჯამში, 2019 წელთან შედარებით, 2020 წელს ჯგუფმა 3% ზრდა აჩვენა. ალკოჰოლური სასმელების თვითღირებულება ₾ 67 მლნ იყო.
2019 წელს KTW ჯგუფმა თბილისში, ფიროსმანის ქუჩაზე, მოსახლეობისაგან გამოისყიდა საცხოვრებელი ფართები, სადაც დაგეგმილია მრავალფუნქციური საცხოვრებელი კომპლექსის მშენებლობა. ამავე წელს KTW ჯგუფმა კახეთის რეგიონში შეიძინა 6,525 ჰა სასოფლო-სამეურნეო დანიშნულების მიწის ნაკვეთები. აღნიშნულ მიწებზე იგეგმება სხვადასხვა სახეობის მრავალწლიანი კულტურების გაშენება. ასევე, KTW ჯგუფი აქტიურად არის ჩართული კახეთის რეგიონში, ქალაქ ყვარელში და სოფელ ზიარში ფართომასშტაბიან პროექტებში. აღნიშნული პროექტის თანახმად, ჯგუფი გააშენებს თანამედროვე სტანდარტებით აღჭურვილ ღვინის სოფელს.
ასევე, ჯგუფი გეგმავს ქალაქ დუშეთში ტურისტული კომპლექსის მშენებლობას, რომლისთვისაც აღებული აქვს საინვესტიციო ვალდებულება, რომლის მიხედვითაც უნდა მოახდინოს 1,000,000 ლარის ინვესტირება.
2020 წელს KTW ჯგუფმა პოლონეთში დააფუძნა კომპანია “KTW IMPORT & DISTRIBUTION”, რომლის საქმიანობის სფეროს წარმოადგენს ევროპის სხვადასხვა ქვეყნების ბაზრებზე პროდუქციის წარდგენა/რეალიზაცია. გასული წლის დეკემბერში KTW ჯგუფმა ორწლიანი ვადით გამოუშვა $10 მლნ–ის ღირებულების ფასიანი ქაღალდები, რომლის მიზნობრიობა არის არაპროფილური საბანკო სესხების გადაფარვა და სოფლის მეურნეობის დარგის განვითარება.
2020 წელს ხელფასებზე „კახურმა ტრადიციულმა მეღვინეობამ“ ₾ 2 მლნ. დახარჯა, ვენახების მოვლაზე 1,6, ქველმოქმედებაში კი 205 888 ლარი. უცხოური ვალუტის კონვერტაციით გამოწვეული წმინდა ზარალი კომპანიაში ₾ 12 მილიონი იყო.
შპს „კახური ტრადიციული მეღვინეობა“ 2001 წელს დაარსდა. კომპანიის ძირითადი საქმიანობა არის ღვინის და სპირტიანი სასმელების წარმოება და წარმოებული პროდუქციის საცალო და საბითუმო ვაჭრობა. კომპანიის წილის 100%-ს ბიზნესმენი ზურაბ ჩხაიძე ფლობს. ამჟამად, ჯგუფს აქვს ხუთი მოქმედი ღვინის ქარხანა, მათგან ოთხი კახეთში მდებარეობს, ხოლო ერთი აჭარაში.
ღვინის ეროვნული სააგენტოს მონაცემებით, რომელიც ეფუძნება გაცემულ საექსპორტო სერტიფიკატებს, 2020 წელს საქართველოდან მსოფლიოს 60 ქვეყანაში 92,4 მლნ-მდე ბოთლი (0,75 ლ) ღვინო იყო ექსპორტირებული, რაც 2019 წლის რაოდენობაზე 1%-ით ნაკლებია. ექსპორტირებული ღვინის ღირებულება 216,5 მლნ აშშ დოლარს აღწევს, რაც 2019 წლის ანალოგიურ მონაცემზე 9%-ით ნაკლებია.
ბაჩო ადამია