„რუსეთ-უკრაინის ომი კულას გაყიდვებზე არ ასახულა, რადგან ამ ბაზარზე დიდად  დამოკიდებულები არ ვყოფილვართ“, -  ამის შესახებ „კომერსანტს“კომპანია “კულას” ხელმძღვანელმა ივანე გოგლიძემ უთხრა. მისი თქმით, რუსეთში და უკრაინაში საექსპორტო პროდუქციის მხოლოდ 7-8%  მიდიოდა.

მიიღე ინფორმაცია უფრო სწრაფად „კომერსანტის“ Telegram-ზე.

„ამ  ორ  ქვეყანაზე  ექსპორტის მხოლოდ 7-8% გვქონდა და  სხვა ქვეყნებზე  გადავანაწილეთ. ამჟამად პროდუქცია ამერიკაში, ევროპასა და კანადაში გაგვაქვს, ვმუშაობთ ახალ ქვეყნებზეც“, -  აღნიშნა ივანე გოგლიძემ.

რაც  შეეხება ბოთლებს, ივანე გოგლიძის თქმით, ის მხოლოდ უკრაინიდან და რუსეთიდან არ შემოჰქონდათ.

„ბოთლები შემოგვქონდა რუსეთიდან, უკრაინიდან, მოლდოვადან, სომხეთიდან და ჩინეთიდან, ახლა უკრაინა და რუსეთი დაიკეტა, ნაწილობრივ დაიკეტა მოლდოვაც, საქართველოშიც დაიწყო ბოთლების წარმოება და ის მივახმარეთ და ძირითადად  გადავერთეთ უზბეკეთის  ბოთლის წარმოებაზე პირველი პარტია უკვე მივიღეთ“, -  აღნიშნა ივანე გოგლიძემ.

გამომდინარე იქიდან, რომ საქართველოში  შაქარზე და ენერგო მატარებლებზე ფასი გაიზარდა, “კულას“ პროდუქტის ფასის დაახლოებით 3% -ით დაკორექტირება მოუწია.

“რაც შეეხება ფასებს, იქიდან  გამომდინარე,  რომ  შაქარი,  ელექტრო ენერგია და  გაზი გაძვირდა, დაახლოებით თვენახევრის წინ პროდუქტის ფასის  3%  იანი კორექტირება მოგვიწია., თუმცა გაყიდვებს არ ვემდურებით და  უფრო და უფრო მეტ შეკვეთას ვიღებთ“, -  აღნიშნა ივანე გოგლიძემ.

გორის საკონსერვო ქარხანა კულა” 2009 წელს ჩამოყალიბდა. კომპანიამ პირველივე წელს მოიპოვა ეკოლოგიურად სუფთა პროდუქტების მწარმოებლის სახელი და გახდა ლიდერი საქართველოში ნატურალური წვენების წარმოებაში.

2010 წლიდან კომპანია აქტიურად შეუდგა ხილისა და ბოსტნეულის კონსერვების წარმოებას და ამ დროისათვის კომპანია აწარმოებს 250 დასახელების საკონსერვო პროდუქციას.

ამჟამად, კომპანია კულას გააჩნია ხუთი საწარმო, რომელიც მძლავრ აგრარულ სექტორად ითვლება სოფლის მეურნეობის პროდუქტების, კერძოდ ხილის, ბოსტნეულის და სხვა კულტურების წარმოებაში.

თაკო კვაჭანტირაძე