თურქეთის ქალაქ ანტალიაში უკრაინის და რუსეთის საგარეო საქმეთა მინისტრების, დმიტრო კულებას და სერგეი ლავროვის შეხვედრა დასრულდა. შეხვედრის შემდეგ დიმიტრი კულებას ბრიფინგი დაიწყო. საგარეო საქმეთა მინისტრმა განაცხადა, რომ მხარეები ცეცხლის შეწყვეტაზე ვერ შეთანხმდნენ. კულებას თქმით, შეხვედრაზე ორი დავალებით მივიდა. მან ჰუმანიტარული დერეფნის მოწყობა და 24-საათიანი ზავის შეთანხმება მოითხოვა, რათა ჰუმანიტარული საკითხების მოაგვარონ.
„ზავის თაობაზე პროგრესი არ არის. გადაუდებელი ჰუმანიტარული საკითხების მოსაგვარებლად ჩვენ 24-საათიანი ზავის საკითხი დავაყენეთ, მაგრამ ამ მხრივ პროგრესი არ მიგვიღწევია, რადგან, როგორც ჩანს, რუსეთის ფედერაციაში სხვა ადამიანები იღებენ გადაწყვეტილებას ამ საკითხზე.
ჩვენ შევთანხმდით, რომ გავაგრძელოთ დიალოგი ჰუმანიტარული საკითხების მოსაგვარებლად, მზად ვარ ახალი მოლაპარაკებებისთვის ამ ფორმატში, თუ იქნება მნიშვნელოვანი პროგრესის მიღწევისა და გადაწყვეტილებების პოვნის პერსპექტივა.
როდესაც ორი საგარეო საქმეთა მინისტრი შეხვედრას ატარებს, მათ აქვთ მანდატი მშვიდობის და უსაფრთხოების საკითი გადაჭრან, ეს მანდატი მათ პარლამენტებისგან მიიღეს. და მე მზად ვარ გავაგრძელო მოლაპარაკებები, რათა ომი უკრაინაში დასრულდეს, დასრულდეს უკრაინის მოქალაქეების ტანჯვა და გავათავისუფლოთ უკრაინის ტერიტორიები რუსი ოკუპანტებისაგან“, განაცხადა კულება.
ლავროვის თქმით, ჰუმანიტარული დერეფნების ყოველდღე გახსნის შეთანხმება ძალაში დარჩა. მისივე თქმით, დერეფნების მარშრუტს და გასვლის დროს წყდება იმ პირების მიერ, ვინც ხმელეთზე აკონტროლებს სიტუაციას.
მოლაპარაკებები თითქმის საათ-ნახევარი გაგრძელდა.