საქართველოს ხელოვნების სასახლე - კულტურის ისტორიის მუზეუმი კერძო პირისგან ბეშქენ ოქრომჭედელის მიერ დამზადებულ ვერცხლის საწინამძღვრო ჯვარს შეიძენს, რაშიც მუზეუმმა კერძო პირს 147000 ლარი უნდა გადაუხადოს.

კულტურის ისტორიის მუზეუმი წარმოადგენს საქართველოს ერთ-ერთ უდიდეს სიძველეთსაცავს და მის უმთავრეს მოვალეობას წარმოადგენს, როგორც მის ფონდებში დაცული მასალის დაცვა/მოვლა, ასევე ახლადშეძენილი უნიკალური მასალით მათი შევსება. სწორედ აღნიშნული ფუნქციის განსახორციელებლად მუზეუმი დადგენილი წესით მუდმივად ახორციელებს სამუზეუმო ექსპონატების შეძენას.

ამჯერად მუზეუმმა უნდა მოახდინოს მესაკუთრის მიერ გასაყიდად გამოტანილი, მე-15 საუკუნის ვერცხლის საწინამძღვრო ჯვარი. ექსპონატი ხელოვნების გამორჩეულ ნიმუშს წარმოადგენს. ის უნიკალური და იშვიათია როგორც მხატვრული, ასევე ისტორიული ღირებულებით. ის შესრულებულია მე-15 საუკუნისათვის დამახასიათებელი ასომთავრული ანბანით (რომელიც გარდამავალია ხუცურში).

საინტერესოა წარწერა, საიდანაც ირკვევა, რომ ჯვარი საწინამძღვროა და ის ბეშქენ ოქრომჭედელს შეუსრულებია. ამავე წარწერის მიხედვით ირკვევა სამი ისტორიული პირის: „შეთას, იას და ღიდის“ სახელები, ისინი ჯვრის მომგებნი ან დამკვეთები უნდა იყვნენ, სავარაუდოდ ეს ადამიანები სვანეთის წარჩინებულ საგვარეულოს მიეკუთვნებოდნენ.

თავად კულტურის ისტორიის მუზეუმის განმარტებით, ხატი უნიკალური და საყურადღებოა გაფორმების თვალსაზრისითაც.

ჯვრის ძირში ვხედავთ ფეხზე მდგომ, აბჯროსან წმინდა გიორგის, ჯვრის თავზე კი იგივე ფორმაში მიქაელ მთავარანგელოზი უნდა იდგეს. ეს დიდი ზომის საწინამძღვრო ჯვარი ქართული ოქრომჭედლობის უნიკალური და დღემდე უცნობი ნიმუშია. გამომდინარე ყოველივედან, მისი შესყიდვა უდიდესი წინგადადგმული ნაბიჯი იქნება როგორც ფონდების უძვირფასესი ხელოვნების ნიმუშის შევსების, ასევე ქართული კულტურისა და ისტორიის განვითარების საქმეში.

გამომდინარე ზემოაღნიშნულიდან, გთხოვთ, „გამარტივებული შესყიდვის კრიტერიუმების განსაზღვრისა და გამარტივებული შესყიდვის ჩატარების წესის დამტკიცების თაობაზე“ სახელმწიფო შესყიდვების სააგენტოს თავმჯდომარის 2015 წლის 17 აგვისტოს #13 ბრძანებით დამტკიცებული წესის მე-3 მუხლის პირველი პუნქტის „ა“ ქვეპუნქტისა და მე-5 მუხლის პირველი პუნქტის საფუძველზე, მოგვცეთ თანხმობა, სახელმწიფო შესყიდვების გამარტივებული შესყიდვის საშუალებით განვახორციელოთ ზემოაღნიშნული საწინამძღვრო ჯვრის შეძენა“, აღნიშნულია სსიპ - საქართველოს ხელოვნების სასახლის - კულტურის ისტორიის მუზეუმის გენერალური დირექტორის გიორგი კალანდიას მიერ სსიპ ,,სახელმწიფო შესყიდვების სააგენტოს“ თავმჯდომარისთვის მიწერილ წერილში, რითაც მუზეუმმა გამარტივებული შესყიდვის მიცემის უფლება ითხოვა.