ეკონომიკისა და მდგრადი განვითარების მინისტრმა სსიპ კურორტების განვითარების სააგენტოს დებულება დაამტკიცა, რომელიც ძალაში 15 ივლისიდან შევა. 15 ივლისიდან შეუდგება სააგენტოც მუშაობას, რომელსაც სანდრო ონოფრიშვილი უხელმძღვანელებს, რომელიც მანამდე სამთო საკითხებში ეკონომიკისა და მდგრადი განვითარების მინისტრის მრჩევლის პოზიციას იკავებდა.

უწყების დებულების თანახმად, სააგენტოს მიზანია კურორტებისა და საკურორტო ადგილების შესაბამისი გეოინფორმაციული რუკების მომზადება, მათ შორის საკურორტო ადგილების რეესტრის, ეკონომიკური მდგომარეობის, ასევე შესაბამისი რესურსების შესახებ ინფორმაციის, კლიმატური და სხვა პირობების შესახებ მონაცემების სისტემატიზაცია, მონაცემთა ბაზის შექმნა და მათი განახლების სამუშაოთა ორგანიზება.

ასევე კურორტებისა და საკურორტო ადგილების განვითარების მიზნით წინადადებებისა და რეკომენდაციების მომზადება, საკურორტო პოლიტიკის შემუშავების ხელშეწყობა და კურორტებსა და საკურორტო ადგილებში ადგილობრივი მოსახლეობის დასაქმების ხელშეწყობის მიზნით შესაბამის უწყებებთან თანამშრომლობა.

აღსანიშნავია, რომ სახელმწიფოს მიერ დაფუძნებული იყო შპს „მთის კურორტების მართვის კომპანია“, რომლის წესდებაც და სახელიც 2021 წლის ივნისში მთავრობამ შეცვალა და ის დღეს არის შპს „ემ თი ეი“ [MTA].

ამ კომპანიის მართვაში ახლაც რჩება საქართველოს სამთო-სათხილამურო კურორტები. პარალელურად, „ემ თი ეის“, შეუძლია ნებისმიერი საქმიანობა, რაც კანონმდებლობით არ არის აკრძალული.

„300-ზე მეტი საკურორტე ადგილი და 100-ზე მეტი მოქმედი კურორტი გვაქვს. თითოეული ამ კურორტის განვითარებისთვის გვჭირდებოდა კონკრეტული სამუშაო ჯგუფი, რომელსაც გარკვეული ლეგიტიმაცია ექნება. ამ სსიპ-ის არსი იქნება სხვადასხვა უწყების კოორდინაცია. ამიტომ ცალკე დეპარტამენტი ან განყოფილება რომელიმე უწყებაში უფრო ნაკლები ლეგიტიმაციის მქონე და ანგარიშგასაწევი შეიძლება იყოს, ვიდრე კონკრეტულ ამოცანაზე ორიენტირებული ჯგუფი. ეს იქნება მცირე მობილური ჯგუფი, რომლის ამოცანაც და პასუხისმგებლობაც იქნება, რომ მოხდეს პოტენციალის შესწავლა, სწორედ დაგეგმვა, მათ შორის სივრცითი დაგეგმვა ამ კურორტებზე და მოხდეს საინვესტიციო პაკეტების იმგვარად ჩამოყალიბება, რომ კერძო სექტორმა ეფექტურად ინვესტირება მოახერხოს,“ — განაცხადა რამდენიმე დღის უკან ეკონომიკისა და მდგრადი განვითარების მინისტრმა ლევან დავითაშვილმა კურორტების განვითარების სააგენტოს არსსა და შექმნის აუცილებლობაზე საუბრისას.