ახალ სსიპ-ს კურორტების განვითარების სააგენტოს სანდრო ონოფრიშვილი უხელმძღვანელებს. ამის შესახებ ეკონომიკის მინისტრმა ლევან დავითაშვილმა მთავრობის სხდომის დასრულების შემდეგ განაცხადა.
ცნობისთვის, სანდრო ონოფრიშვილი 2013 წლიდან 2018 წლამდე მთის კურორტების განვითარების კომპანიას ხელმძღვანელობდა. 2018 წლიდან დღემდე კი სამთო საკითხებში ეკონომიკის და მდგრადი განვითარების მინისტრის მრჩევლის პოსტი ეკავა.
„300-ზე მეტი საკურორტე ადგილი და 100-ზე მეტი მოქმედი კურორტი გვაქვს. თითოეული ამ კურორტის განვითარებისთვის გვჭირდებოდა კონკრეტული სამუშაო ჯგუფი, რომელსაც გარკვეული ლეგიტიმაცია ექნება. ამ სსიპ-ის არსი იქნება სხვადასხვა უწყების კოორდინაცია. ამიტომ ცალკე დეპარტამენტი ან განყოფილება რომელიმე უწყებაში უფრო ნაკლები ლეგიტიმაციის მქონე და ანგარიშგასაწევი შეიძლება იყოს, ვიდრე კონკრეტულ ამოცანაზე ორიენტირებული ჯგუფი. ეს იქნება მცირე მობილური ჯგუფი, რომლის ამოცანაც და პასუხისმგებლობაც იქნება, რომ მოხდეს პოტენციალის შესწავლა, სწორედ დაგეგმვა, მათ შორის სივრცითი დაგეგმვა ამ კურორტებზე და მოხდეს საინვესტიციო პაკეტების იმგვარად ჩამოყალიბება, რომ კერძო სექტორმა ეფექტურად ინვესტირება მოახერხოს,“-განაცხადა დავითაშვილმა კურორტების განვითარების სააგენტოს არსსა და შექმნის აუცილებლობაზე საუბრისას.
შესახსენებთ, რომ საქართველოში ახალი სსიპ - კურორტების განვითარების სააგენტო შექმნის შესახებ, მთავრობის 20 ივნისის დადგენილებიდან გახდა ცნობილი.
როგორც დადგენილებაშია აღნიშნული, სააგენტოს უფლებამოსილება განისაზღვრება ეკონომიკისა და მდგრადი განვითარების მინისტრის მიერ დამტკიცებული დებულებით. სააგენტოს დირექტორს თანამდებობაზე ნიშნავს და თანამდებობიდან ათავისუფლებს ასევე ეკონომიკისა და მდგრადი განვითარების მინისტრი. ამასთან, სააგენტოს სახელმწიფო კონტროლს ახორციელებს ეკონომიკისა და მდგრადი განვითარების სამინისტრო.
bpn.ge